އާޖެންޓީނާގެ ހުނަރުވެރި ފޯވާޑް ހޫލިއަން އަލްވަރޭޒް، 95 މިލިޔަން ޔޫރޯގެ ޓްރާންސްފާ ފީ އަކަށް ސްޕެއިނުގެ އެތުލެޓިކޯ މެޑްރިޑަށް ވިއްކާލަން މެންޗެސްޓަރ ސިޓީއިން އެއްބަސްވެއްޖެއެވެ.
މެންޗެސްޓަރ ސިޓީއިން އަލްވަރޭޒް ގަތީ 2022 ވަނަ އަހަރު އެންމެ 14 މިލިޔަން ޕައުންޑަށެވެ. އޭރު އޭނާ ކުޅެމުންދިޔައީ އާޖެންޓީނާގެ ރިވަރޕްލޭޓަށެވެ.
އަލްވަރޭޒް ވެގެންދާނީ ސިޓީއިން މިހާތަނަށް އެންމެ ބޮޑު އަގުގައި ވިއްކާލި ކުޅުންތެރިޔާއަށެވެ. ރިޕޯޓުތައް ބުނާ ގޮތުގައި އަލްވަރޭޒް ވިއްކާލައިގެން ލިބޭ ފައިސާ ގާޑިއޯލާ ބޭނުން ކުރާނީ ސިޓީއަލުން ބިނާ ކުރުމަށެވެ.
އަލްވަރޭޒްގެ ޓްރާންސްފާ ފީގެ ތެރެއިން 64 މިލިޔަން ޕައުންޑް އެތުލެޓިކޯއިން އެއްފަހަރާ ދައްކާނާއެވެ. ބާކީ ބައި ދޭނީ އިންސްޓޯލްމަންޓްތަކަށް ބަހާލައިގެންނެވެ.
ސިޓީއާ ގުޅުމަށްފަހު މިދިޔަ ދެހަރާއި ބައިގެ މުއްދަތު ތެރޭގައި އަލްވަރޭޒް ވަނީ އެކްލަބަށް ކުޅެދިން 103 މެޗުގައި 36 ވަނީ ކާމިޔާބު ކޮށްދީފައެވެ. އަލްވަރޭޒް ސިޓީ ދޫކޮށްލަން ބޭނުންވި މައިގަނޑު ސަބަބަކީ އެކްލަބުގެ ފުރަތަމަ އެގާރައިން ޖާގަ ނުލިބުމެވެ. އަލްވަރޭޒްގެ ބަދަލުގައި ކޯޗް ޕެޕް ގާޑިއޯލާ ގިނައިން ފުރުސަތު ދެނީ ނޯވޭގެ ފޯވާޑް އާލިންގ ހާލަންޑަށެވެ.
އަލްވަރޭޒް ވަނީ ސިޓީއާއެކު ޕްރިމިއަރ ލީގް 2 ފަހަރު، ޗެމްޕިއަންސް ލީގާއި ކްލަބް ވަރލްޑް ކަޕާއި ޔުއެފާ ސްޕަރ ކަޕް އަދި އިނގިރޭސި އެފްއޭ ކަޕް އެއްފަހަރު ހޯދާފައެވެ. ގައުމީ ޓީމާއެކު އަލްވަރޭޒް ހޯދި ކާމިޔާބީތަކަށް ބަލާއިރު، 2022 ވަަނަ އަހަރު ވަރލްޑް ކަޕް އާޖެންޓީނާއަށް ކާމިޔާބު ކޮށްދިނުމުގައި ވަރަށް މުހިއްމު ދައުރެއް އަދާކުރިއެވެ. އަދި ފާއިތުވެދިޔަ ދެ ކޮޕާ އެމެރިކާ ހޯދި އާޖެންޓީނާ ގައުމީ ޓީމުގައިވެސް އޭނާ ހިމެނުނެވެ.
