ސައުދި އަރަބިއްޔާގެ ސިޓީއެއްކަމައްވާ ދަންމާމުގައި ހުންނަ ކިންގ އަބްދުލްއަޒީޒް ޕޯޓުން އައު ރެކޯޑެއް ޤާއިމުކޮށްފިއެވެ.
އެއީ ކޮސްކޯ ޝިޕިންގ އަކުއޭރިއަސް 036އީ އުޅަނދުން 20،645 ސްޓެންޑަޑް ކޮންޓެއިނަރު ބޭލުމެވެ.
މިކަމުން ސައޫދީ އަރަބިއްޔާގެ ކަނޑުދަތުރުފަތުރުގެ ދާއިރާ ފުޅާވަމުން އަންނަ މިންވަރު ހާމަވެގެންދެއެވެ. އަދި މި ކާމިޔާބީއަކީ ވިޔަފާރިއާއި ލޮޖިސްޓިކްސްގެ ދާއިރާ ފަސޭހަކުރުމުގައި މި ބަނދަރުގެ މުހިންމު ދައުރު ދައްކުވައިދޭ ކަމެކެވެ.
ސައުދީގެ ޤައުމީ ދަތުރުފަތުރާއި ލޮޖިސްޓިކްސް ސްޓްރެޓެޖީގެ މަޤްޞަދަކީ ސައޫދީ އަރަބިއްޔާ ދުނިޔޭގެ ލޮޖިސްޓިކްސްގެ މަރުކަޒަކަށް ހެދުމެވެ. މި ލަނޑުދަނޑިއާ އެއްގޮތަށް، މި ކާމިޔާބީއަކީ ސައޫދީ ޕޯޓްސް އޮތޯރިޓީ (މަވާނީ) އިން ބަނދަރުތަކުގެ ހަރުދަނާކަން އިތުރުކޮށް، ބައިނަލްއަޤްވާމީ ވިޔަފާރީގެ ގުޅުންތައް ވަރުގަދަކުރުމުގައި ހޯދާފައިވާ ކާމިޔާބީއެއްކަން ފާހަގަކުރެވެއެވެ.
ފަހަކަށްއައިސް ކިންގ އަބްދުލްއަޒީޒް ޕޯޓުގައި އިންފްރާސްޓްރަކްޗަރ ތަރައްޤީކުރުމުގެ ގޮތުން 21 ކޯސްޓަލް އަދި ބްރިޖް ކްރޭންތައް ގެނެސް، ސައޫދީ ގްލޯބަލް ޕޯޓްސް ކޮމްޕެނީން 7 ބިލިއަން ސައޫދީ ރިޔާލް (1.86 ބިލިއަން އެމެރިކާ ޑޮލަރު) ގެ ބޮޑު އިންވެސްޓްމަންޓެއް ކޮށްފައިވެއެވެ. މީގެ އިތުރުން، ޗައިނާގެ ސާނީ ކުންފުންޏާއެކު ވެވުނު މުހިންމު އެއްބަސްވުމެއްގެ ދަށުން 80 ކަރަންޓު ޓްރަކު ގަތުމަށްވެސް ހަމަޖެހިފައިވެއެވެ. މިއީ މި ކުންފުނިން އެއްފަހަރާ މިފަދަ އުޅަނދުތައް ގަތުމަށް ކުރެވުނު އެންމެ ބޮޑު އޯޑަރެވެ.
މީގެ އިތުރުން، މާރްޗު މަހު، މަވާނީއިން ދަންމާމާއި އިރުމަތީ އޭޝިއާ ގުޅުވައިދޭ އައު ކަނޑު ދަތުރުފަތުރުގެ ޚިދުމަތެއް ތަޢާރަފުކޮށްފައިވެއެވެ. މިއީ މި ބަނދަރުގެ ސްޓްރެޓެޖިކް މުހިންމުކަން އިތުރަށް ހަރުދަނާކުރުމަށް އެޅުނު ފިޔަވަޅެކެވެ. މި ޚިދުމަތާއެކޮށް ވިޔަފާރިއަށް މުހިންމު ސަރަހައްދުތައްކަމަށްވާ ޗައިނާ، ދެކުނު ކޮރެއާ، މެލޭޝިއާ، އޮމާން އަދި ޔޫއޭއީ އާއި ގުޅުވާލާ ސައޫދީ އަރަބިއްޔާގައި މުދާ ޓްރާންސިޓްކުރާ މައި މަރުކަޒެއްގެ ގޮތުގައި މި ބަނދަރުގެ މަޤާމު އިތުރަށް ވަރުގަދަވެގެންދާނެއެވެ.
