ޖަޕާނުގެ ދެކުނު އައްސޭރިފަށުގައި ވަރުގަދަ ބިންހެލުމެއް އަރައިފިއެވެ. މިކަމާ ގުޅިގެން ސުނާމީގެ އިންޒާރެއް ދީފައިވާ ކަމަށް ޖަޕާނުގެ މޫސުމާބެހޭ އިދާރާ (ޖޭއެމްއޭ) އިން ބުނެފައިވެއެވެ. ނަމަވެސް މިހާތަނަށް ބޮޑު ގެއްލުމެއް ލިބިފައިވާކަމުގެ އަލާމާތެއް ފެނިފައެއް ނުވެއެވެ.
ޖަޕާނުގެ މޫސުމާބެހޭ އިދާރާއިން ބުނެފައިވަނީ މި ބިންހެލުމުގެ ފުރަތަމަ ރެޖިސްޓަރކުރީ 6.9 މެގްނިޓިއުޑް ކަމަށާއި، މި ބިންހެލުން އަރާފައިވަނީ ޖަޕާނުގެ ދެކުނު މައި ރަށްކަމުގައިވާ ކިއުޝޫގެ އިރުމަތީ އައްސޭރިފަށުން ގާތްގަނޑަކަށް 30 ކިލޯމީޓަރު ފުންމިނުގައި ކަމަށެވެ.
މި އިދާރާއިން ސުނާމީގެ އިންޒާރެއް ދީ، ކިއުޝޫގެ ދެކުނު އައްސޭރިފަށާއި ޝިކޯކޫ ރަށުގެ ކައިރި ސަރަހައްދުތަކުގައި 1 މީޓަރު އުސްމިނުގެ ރާޅުތަކެއް އަރާފާނެކަމަށް ލަފާކޮށްފައިވެއެވެ.
ކިއުޝޫ އަދި ޝިކޯކޫގައި ހުރި ނިއުކްލިއަރ ޕްލާންޓްތައް ހިންގާ ފަރާތްތަކުން ބުނެފައިވަނީ އެތަންތަނަށް އެއްވެސް ގެއްލުމެއް ލިބިފައިވޭތޯ ބަލަމުންދާ ކަމަށެވެ.
ޖަޕާނުގެ އެންއެޗްކޭ ޕަބްލިކް ޓެލެވިޒަނުން ބުނެފައިވަނީ ބިންހެލުން އެންމެ ބޮޑަށް އަސަރުކުރި ސަރަހައްދާ ކައިރީގައިވާ މިޔަޒަކީ އެއަރޕޯޓުގެ ބައެއް ކުޑަދޮރުތައް ތަޅައިލާފައިވާކަމުގެ ރިޕޯޓުތަކެއް ލިބިފައިވާ ކަމަށެވެ.
ޖަޕާނަކީ ޕެސިފިކް އޯޝަނުގެ ވަށައިގެންވާ ބިންގަނޑުގެ ފޯލްޓްލައިން ކަމަށްވާ "ރިންގް އޮފް ފަޔަރ" ގައި އޮންނަ ޤައުމަކަށްވުމާއެކު، ދުނިޔޭގައި އެންމެ ގިނައިން ބިންހެލުން އަރާ ޤައުމުތަކުގެ ތެރޭގައި ހިމެނޭ ޤައުމެކެވެ. މިއަހަރު ޖެނުއަރީ 1 ވަނަ ދުވަހު ޖަޕާނުގެ މެދު އުތުރު ސަރަޙައްދު ކަމުގައިވާ ނޯޓޯގައި ހިނގި ބިންހެލުމުގެ ސަބަބުން 240 އަށްވުރެ ގިނަ މީހުން މަރުވެފައިވެއެވެ.
