ވޫލްވްސްއަށް ކުޅެމުން އަންނަ ޕޯޗުގަލްގެ ފޯވާޑް, ޕެޑްރޯ ނެޓޯ ގަތުމަށް ޗެލްސީއިން އެއްބަސްވެއްޖެއެވެ.
އިޓަލީގެ ޖާނަލިސްޓް ފަބްރީޒިއޯ ރޮމާނޯ ވަނީ ޕެޑްރޯ ނެޓޯ ވިއްކާލުމަށް ވޫލްވްސް އާއި ޗެލްސީއާ އެއްބަސްވުމަކަށް ވާސިލުވެއްޖެކަން ހާމަކޮށްދީފައެވެ. ފަބްރީޒިއޯ ހާމަކުރި ގޮތުގައި ވޫލްވްސްއިން ނެޓޯގެ އަގެއްގެ ގޮތުގައި ކަނޑައެޅީ 70 މިލިއަން ޑޮލަރާ ގާތް ކުރާ އަދަދެއް ކަމަށެވެ.
ނެޓޯގެ އޭޖެންޓް ހޯހޭ މެންޑޭސް ވަނީ އިއްޔެގެ ވަގުތެއްގައި ޗެލްސީއާއެކު ޓްރާންސްފާގެ އެއްބަސްވުންތަކުގެ ފަހުގެ މަރުހަލާތައް ފުރިހަމަކޮށްފައެވެ. ޗެލްސީ އާއި ވޫލްވްސްއަށް އެއްބަސްވުމަކަށް ވާސިލުވުމުގެ ކުރިން ނެޓޯ ވަނީ ޗެލްސީއަށް ސޮއިކުރަން ބޭނުންވާކަމަށް އެ ކްލަބަށް ޔަގީންކޮށްދީފައެވެ.
ފަބްރީޒިއޯ ހާމަކުރި ގޮތުގައި ނެޓޯއަށް ޗެލްސީއިން ހުށަހެޅީ 2030 ވަނަ އަހަރުގެ ޖޫން މަހުގެ ނިޔަލަށް ހަމަވާ ކޮންޓްރެކްޓެވެ. ނެޓޯ, މިއަދުގެ ވަގުތެއްގައި މެޑިކަލް ޓެސްޓުތައް ހެދުމަށް ޓަކައި ލަންޑަނަށް ދާނެކަމަށް މީޑިއާތަކުން މައުލޫމާތު ދެއެވެ.
ނެޓޯއަކީ ޗެލްސީއިން މި ހޫނު މޫސުމުގެ ޓްރާންސްފާ ވިންޑޯގައި ސޮއިކުރި ނުވަވަނަ ކުޅުންތެރިޔާކަން ފާހަގަކޮށްލަން ޖެހެއެވެ.
