ފަލަސްތީނުގެ މުސްލިމުންނާ ދެކޮޅަށް ޤަތުލް އާންމުތައް ހިންގަމުން އަންނަ އިޒްރޭލަށް ހަތިޔާރު ގަންނަން އެމެރިކާއިން 3.5 ބިލިޔަން ޑޮލަރު ދީފިއެވެ.
ހަތިޔާރު ގަންނަން އެމެރިކާއިން 3.5 ބިލިޔަން ޑޮލަރު އިޒްރޭލަށް ދީފައި މިވަނީ، މިދިޔަ ހޮނިހިރު ދުވަހުގެ ރޭ ފަތިސް ނަމާދު ވަގުތު ޣައްޒާގެ މިސްކިތަކަށާއި ސްކޫލަކަށް ލާއިންސާނީ ހަމަލާއެއްދީ 100 އެއްހައި މީހުން ޝަހީދު ކޮށްލިތާ އެންމެ ދުވަހެއްވެސް ނުވެ އުޅެނިކޮށެވެ. މިހަމަލާގައި ޝަހީދުވި ބައެއް މީހުންގެ ހަށިގަނޑުތައް ހުރީ ވަކިކުރަން ނޭނގޭވަރަށް ކުދިކުދިވެފައެވެ. ހަށިގަނޑުތަކުގެ ބައިތައް އަޅާފައިހުރި ކޮތަޅުތައް ހުރި ވީޑިއޯތައް އަލްޖަޒީރާއިން ވަނީ ބްރޮޑްކާސްޓް ކޮށްފައެވެ.
އެމެރިކާއިން ދިން 3.5 ބިލިޔަން ޑޮލަރު ބޭނުންކޮށްގެން އިޒްރޭލަށް ހަތިޔާރު ގަނެވޭނީ ހަމައެކަނި އެމެރިކާގެ ކުންފުނިތަކުން ކަމަށް އެމެރިކާއިން ބުނެއެވެ. މާނައަކީ ކުރިއަށް އޮތް ތަނުގައި ހައްދުފަނައެޅި އިޒްރޭލުން ބޭނުންކުރާ ހުރިހާ ހަތިޔާރެއް ފޯރުކޮށްދޭނީ އެމެރިކާއިން ކަމެވެ.
ފަލަސްތީނުގެ މުސްލިމުންނާ ދެކޮޅަށް އިޒްރޭލުން ހިންގަމުން އަންނަ ޤަތުލް އާންމުތައް ހުއްޓުވުމަށް އދ.ގެ ސަލާމަތީ މަޖިލިސް މެދުވެރިކޮށް ރަޝިޔާއިން ދެފަހަރަށް ކުރި މަސައްކަތްވެސް ވީޓޯ ކުރީ އެމެރިކާއިންކަން ފާހަގަ ކޮށްލެވެއެވެ.
