ޣައްޒާގެ ސްކޫލަކަށް ޒަޔަނިސްޓް އިސްރާއީލުން ހަަމަލާދީ ހިންގި ނުރައްކާތެރި ޤަތުލްއާންމު ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފިއެވެ.
މި ހަމަލާ އަމާޒުކޮއްފައިވަނީ ޣައްޒާގެ އައް-ތާބިއީން ސްކޫލަށެވެ. މި ސްކޫލަކީ ފަލަސްތީނުގެ އެތައް ހާސް ބައެއް ވަގުތީ ހިޔަލެއްގެ ގޮތުގައި ބޭނުން ކުރަމުންދިޔަ ސްކޫލެކެވެ. އަދި އެ ހަމަލާގައި 100 އަށްވުރެ ގިނަ މީހުން ވަނީ ޝަހީދުވެފައެވެ. ރިޕޯޓުތަކުން ބުނާގޮތުގައި މި ހަމަލާ ދީފައިވަނީ ގިނަ ޢަދަދެއްގެ ބަޔަކު ފަތިސް ނަމާދުގެ ޖަމާޢަތުގައި ނަމާދު ކުރަމުން ދިޔަ ވަގުތުގައެވެ.
ޚާރިޖީ ވުޒާރާއިން ނެރުނު ނޫސްބަޔާނެއްގައި ވިދާޅުވީ ދިވެހި ސަރުކާރުން ޣައްޒާ ސިޓީގައި ހުރި އަލް-ތަބީއިން ސްކޫލަށް އިސްރާއީލުން ދިން މި ބޮމުގެ ހަމަލާ ވަރަށް ހަރުކަށި އިބާރާތުން ކުށްވެރިކުރާކަމަށެވެ.
ޚާރިޖީ ވުޒާރާއިން އިތުރަށް ވިދާޅުވީ މިފަދަ އާންމު ރައްޔިތުންނާއި ކުޑަކުދިންނަށް އަމާޒުކޮށްގެން ދެވޭ ނަސްލު ނައްތާލުމުގެ ހަމަލާތަކަކީ ބައިނަލްއަޤްވާމީ ޤާނޫނާއި ބައިނަލްއަޤްވާމީ އިންސާނީ ޙައްޤުތަކުގެ ޤާނޫނުގެ އަސާސީ އުސޫލުތަކާއި އދ. ގެ ސަލާމަތީ މަޖިލީހުގެ ޤަރާރު 2610 އާ ސީދާ ޚިލާފު ޢަމަލުތަކެއްކަމަށާއި އެއީ ޤަތުލްޢާމެއްކަމަށެވެ.
އަދި ފަލަސްޠީނުގެ ކުށެއް ނެތް އާންމު ރައްޔިތުންނަށް ދެވޭ މިފަދަ ހަމަލާތައް ހުއްޓުވުމަށް ހަރުދަނާ ފިޔަވަޅުތަކެއް އަޅައި، ފަލަސްތީނު ރައްޔިތުންނަށް ދެމެހެއްޓެނިވި ސުލްޙަ ހޯދައިދިނުމަށް މަސައްކަތްކުރުމަށް ބައިނަލްއަޤްވާމީ މުޖުތަމަޢުއަށް މި ބަޔާނުގައި ދިވެހި ސަރުކާރުން ގޮވާލާފައިވެއެވެ.
ދިވެހި ސަރުކާރާއި ރައްޔިތުން ދެމިތިބޭނީ ފަލަސްތީނު ރައްޔިތުންގެ އަމިއްލައަށް ނިންމުން ނިންމުމުގެ ޙައްޤާއި ފަލަސްތީނު ދައުލަތެއްގެ ގޮތުގައި ކަނޑައެޅުމުގެ ޙައްޤު ހޯދުމަށް ކުރާ މަސައްކަތުގައި އެ ރައްޔިތުންނަށް ފުރިހަމަ އެއްބާރުލުން ދިނުމުގައިކަމަށްވެސް ޚާރިޖީ ވުޒާރާއިން ވިދާޅުވިއެވެ.
އިސްރާއީލުން ފަލަސްތީނާ ދެކޮޅަށް ދެމުންދާ އަނިޔާވެރި ޢުދުވާނުތައް ހަރުކަށި އިބާރާތުން ކުށްވެރިކުރިކޮށް، ފަލަސްތީނުގެ ޙައްޤުތަކާއި މިނިވަންކަން ހޯދައިދިނުމަށްޓަކައި ދިވެހިރާއްޖެއިން އަންނަނީ ބައިނަލްއަޤްވާމީ މުޖުތަމަޢުގައި ވަކާލާތު ކުރަމުންނެވެ.
