އިސްރާއީލުން ޣައްޒާގެ ސްކޫލަކަށް ހަމަލާދީ އެތައް ބަޔަކު ޝަހީދުކޮށްލުމުން އެކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހަރުކަށި އިބާރާތުން ކުއްވެރި ކުރައްވައިފިއެވެ.
އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ ޣައްޒާގެ އަލް-ތާބިޢީން ސްކޫލުގައި ހިމާޔަތް ހޯދައިގެން ތިބި އެތައް އަންހެނުންނާ، ކުޑަކުދިންނާއި، އުމުރުން ދުވަސްވީ މީހުން ޒަހަމްކޮށްލައި ޝަހީދުކޮށްލާފައި ތިބި ތަނުގެ ބިރުވެރި މަންޒަރުތައް ފެނިގެންދާކަމަށެވެ.
ރައީސް ވިދާޅުވީ އިސްރާއީލުން މިދިޔަ އަހަރުގެ އޮކްޓޫބަރު މަހުން ފެށިގެން ޣައްޒާގައި 39،000 މީހުން ޝަހީދުކޮއްލާފައިވާއިރު މި ގަތުލުއާންމު ހުއްޓާލުމަށް އިސްރާއީލުން އެއްވެސް މަސައްކަތެއް ކުރަމުން ނުދާ ކަމަށެވެ.
އިސްރާއީލުގެ އަމަލުތަކަކީ ބައިނަލްއަގްވާމީ އިންސާނީ ގާނޫނާ ހިލާފު އަމަލުތަކެއް ކަމަށާއި މިކަމަށް އިސްރާއީލާ ދެކޮޅަށް ބައިނަލްއަޤްވާމީ މުޖުތަމަޢުއިން ވަގުތުން ވަގުތަށް ފިޔަވަޅު އަޅަންޖެހޭ ކަމަށްވެސް ރައީސް މުއިއްޒު ވިދާޅުވިއެވެ.
އިޒްރޭލުން ދިން ހަމަލާއާ ގުޅިގެން ދިވެހިރާއްޖޭގެ ޚާރިޖީ ވުޒާރާއިންވެސް ވަނީ އިޒްރޭލުގެ ޢަމަލު ކުށްވެރިކޮށް ރަސްމީ ބަޔާނެއް ނެރެފައެވެ. މި ބަޔާނުގައި ފާހަގަކޮށްފައިވާ ގޮތުގައި، މިފަދަ އާންމު ރައްޔިތުންނަށް އަމާޒުކޮށްގެން ދެވޭ ހަމަލާތަކަކީ ބައިނަލްއަޤްވާމީ އިންސާނީ ޤާނޫނާއި އދ. ގެ ސަލާމަތީ މަޖިލީހުގެ 2،610 ވަނަ ޤަރާރާ ޚިލާފު ޢަމަލެކެވެ.
