ފަލަސްތީނުގެ މިނިވަންކަމަށްޓަކައި މުޅި އުމުރު ހޭދަކުރެއްވި ޑޮކްޓަރ އިސްމާއިލް ހަނިއްޔާގެ މަރުގެ ބަދަލު ހިފުމަށް އިރާނާއި އެގައުމުގެ ބައިވެރިޔާ ލުބްނާނުގެ ހިޒްބުﷲ ޖަމާއަތުން މިއަދުގެ ވަގުތެއްގައި އިޒްރޭލަށް ހަމަލާދީފާނެ ކަމަށް ވަރަށް ބޮޑަށް ބެލެވޭ ކަމަށް ސަހްޔޫނީ އިޒްރޭލުގެ ޑިފެންސް މިނިސްޓަރު ޔޯވް ގައްލަންތު ބުނެފިއެވެ.
އިންޓަލެޖެންސް މައުލޫމާތަށް ބަލާއިރު އިރާނުން ރާވަމުންދަނީ ވަރަށް ވަރުގަދަ ހަމަލާއެއް އިޒްރޭލަށް ދިނުމަށް ކަމަށް ގައްލަންތު ބުންޏެވެ. އަދި ފުރަތަމަ ހަމާލާ ފަށާނީ ހިޒްބުﷲއިން ކަމަށް ލަފާކުރެވޭ ކަމަށާއި އިރާނުން ހަމަލާދޭނީ އޭގެ ފަހުން ކަމަށް ގައްލަންތު ބުންޏެވެ.
އިރާނުން ދީފާނެ ހަމަލާއެއްގެ ބިރަށް އެމެރިކާއިން އިއްޔެގެ ވަގުތެއްގައި ވަނީ ހަނގުރާމަ މަތީ މަނަވަރު "އަބްރަހަމް ލިންކަން" އާއި ސަބްމެރިން "ޖޯޖިއާ" އިޒްރޭލުގެ ދިފާއުގައި ހަރަކާތްތެރިވުމަށް އެސަރަހައްދަށް ފޮނުވާފައެވެ.
ވަރުގަދަ ހަމަލާއެއް އިޒްރޭލަށް ދޭނެކަމަށް ބުނެ އިރާނުން ދެމުން އަންނަ އިންޒާރުތަކާ ގުޅިގެން ޔޫރަޕާއި އޭޝިޔާގެ ގިނަ އަދަދެއްގެ އެއަރލައިންތައް ވަނީ މިދިޔަ ހަފްތާއިން ފެށިގެން އިޒްރޭލަށް ދަތުރު ކުރުން މެދުކަނޑާލާފައެވެ.
