ފާއިތުވި އޮކްޓޯބަރު މަހުން ފެށިގެން ޔަހޫދީ އިސްރާއީލުން ކުރިއަށްގެންދާ ހަނގުރާމައިގެ ސަބަބުން ޢައްޒާ ސަރަޙައްދުގައި 500 އެއްހާ ޞިއްޙީ މަސައްކަތްތެރިން މަރުވެ، އަދި ސަތޭކަތަކެއްގެ އަދަދަކަށް މީހުން ޒަޚަމްވެފައިވާކަމަށް އީރާނުގެ އަލް-އަލަމް ޓީވީ ޗެނަލުން ފަލަސްތީނުގެ ޞިއްޙަތާ ބެހޭ ވުޒާރާއާ ޙަވާލާދީ ރިޕޯޓުކޮށްފިއެވެ.
މީގެ އިތުރުން، އިސްރާއީލުގެ ހަމަލާތަކުގައި ފަލަސްތީނުގެ 130 އެމްބިއުލާންސް ހަލާކުވެފައިވެއެވެ. ފަލަސްތީނުގެ ޞިއްޙީ ވުޒާރާއިން ވިދާޅުވީ ޢައްޒާގެ ޞިއްޙީ ވަސީލަތްތަކަށް ދެވޭ ހަމަލާތަކުގެ ސަބަބުން އާންމު ރައްޔިތުންނަށް އަސާސީ ޞިއްޙީ ޚިދުމަތްތައް ލިބުމަށް ހުރަސްއަޅާކަމަށާއި އަދި ފެނާއި ނަރުދަމާގެ ޙާލަތުގެ ސަބަބުން މަރުވާ މީހުންގެ އަދަދުވެސް އިތުރުވެފައިވާކަމަށެވެ. ވެސްޓް ބޭންކުގައިވެސް ޞިއްޙީ މަރުކަޒުތަކާއި ޑޮކްޓަރުންނަށް ހަމަލާދީފައިވާކަމަށާއި، މިފަދަ 340 އަށްވުރެ ގިނަ ހާދިސާ ރިޕޯޓުކުރެވިފައިވާކަމަށް އެވުޒާރާއިން ވިދާޅުވިއެވެ.
މެދުއިރުމަތީގައި އެންމެ ފަހުން ހާލަތު ގޯސްވެގެން ދިޔައީ ހަމާސްގެ ސިޔާސީ ބިއުރޯގެ އިސްވެރިޔާ އިސްމާޢީލް ހަނިޔާ އަވަހާރަކޮށްލުމާ ގުޅިގެންނެވެ. އެއީ ޖުލައި 31 ވަނަ ދުވަހު ޓެހްރާންގައެވެ. އޭގެ ފަހުން، ޤަޠަރުގެ ސަރުކާރުގެ އިސްވެރިޔާ އަދި ޚާރިޖީ ވަޒީރު، ޝައިޚް މުޙައްމަދު ބިން ޢަބްދުއްރަޙްމާން އާލް ޘާނީ ވަނީ އިސްރާއީލާއި ހަމާސްއާ ދެމެދު ކުރިއަށްދާ މަޝްވަރާތަކުގެ ހަރުދަނާކަމާމެދު ސުވާލު އުފައްދާފައެވެ. އީރާނުގެ އިސްވެރިން ވަނީ ހަނިޔާގެ މަރުގެ ތުހުމަތު އިސްރާއީލުގެ މައްޗަށް އަޅުވައި، ޔަހޫދީ ދައުލަތަށް ބަދަލުހިފުމުގެ އިންޒާރު ދީފައެވެ.
ފާއިތުވި އޮކްޓޯބަރު މަހުން ފެށިގެން އިސްރާއީލުގެ ހަނގުރާމައިގެ ސަބަބުން ގާޒާގައި މަރުވެފައިވާ މީހުންގެ އަދަދު 39,790 އަށް އަރާފައިވާއިރު، 92,002 މީހުން ޒަޚަމްވެފައިވެއެވެ.
