ޕްރޮފެޝަނަލް ފުޓްބޯލް އެސޯސިއޭޝަން (ޕީއެފްއޭ) އިން ކޮންމެ އަހަރަކު ވެސް ހޮވަމުން އަންނަ "ޕީއެފްއޭ ޔަންގް ޕްލޭޔާ" އެވާޑަށް ނޮމިނޭޓްވި 6 ކުޅުންތެރިންގެ ނަންތައް އިއުލާނުކޮށްފިއެވެ.
ޕީއެފްއޭއިން ނެރުނު ލިސްޓުގައި ހިމެނޭ 6 ކުޅުންތެރިންނަކީ:
- ބުކާޔޯ ސާކާ: މި ދިޔަ އަހަރު ވެސް ޕީއެފްއޭ ޔަންގް ޕްލޭޔާ އެވޯޑު ހާސިލުކުރި ސާކާ މި އަހަރު ވެސް މި ވަނީ މި އެވޯޑަށް ނޮމިނޭޓް ވެފައެވެ. އާސެނަލްއަށް ކުޅެމުން އަންނަ 22 އަހަރުގެ ސާކާ ވަނީ މި ދިޔަ ސީޒަނުގައި އެ ކްލަބަށް ހުރިހާ މުބާރާތެއްގައި 20 ލަނޑު ކާމިޔާބުކޮށް, 13 އެސިސްޓު ފޯރުކޮށްދީފައެވެ.
- ކޯލް ޕާމާ: މި ދިޔަ ސީޒަނުގައި މެންޗެސްޓާ ސިޓީއިން ޗެލްސީއަށް ސޮއިކުރި ޕާމާ ވަނީ އާދަޔާހިލާފަށް މޮޅު ކުޅުމެއް ދައްކާފައެވެ. ދަށް ކުޅުމެއް ޗެލްސީގެ ފަރާތުން ފެނިގެންދިޔަ ނަމަވެސް ޕާމާގެ ފަރާތުން ވަނީ ތަފާތު ކުޅުމެއް ފެނިގެންގޮސްފައެވެ. އޭނާ ވަނީ މި ދިޔަ ސީޒަނުގައި ޗެލްސީއަށް 24 ލަނޑު ކާމިޔާބު ކޮށްދީ, 13 އެސިސްޓު ފޯރުކޮށްދީފައެވެ.
- ކޮބީ މައިނޫ: މައިނޫ ވަނީ މި ދިޔަ ސީޒަނުގައި މެންޗެސްޓާ ޔުނައިޓެޑުގެ މިޑްފީލްޑުގައި މުހިއްމު ދައުރެއް އަދާކޮށްފައެވެ. އެންމެ 19 އަހަރުގައި މައިނޫ ވަނީ ޔުނައިޓެޑުގެ ފުރަތަމަ އެގާރައިން ޖާގަ ހޯދާ, އެ ޓީމުގައި އެންމެ ރަނގަޅަށް ކުޅޭ އެއް ކުޅުންތެރިޔާއަށް ވެފައެވެ.
- އަލެހަންޑަރޯ ގަރްނާޗޯ: އާޖެންޓީނާގެ ޒުވާން ފޯވާޑް ގަރްނާޗޯ ވަނީ މި ދިޔަ ސީޒަނުގައި މެންޗެސްޓާ ޔުނައިޓެޑުގެ ފޯވާޑް ލައިނުގައި ތަފާތު ކުޅުމެއް ދައްކާފައެވެ. ޔުނައިޓެޑުގެ ގިނަ ފޯވާޑުންގެ ފޯމު ކަޓާފައި ހުރި ކަމުގައިވިއަސް ގަރްނާޗޯ ވަނީ އެ ކްލަބަށް 10 ލަނޑު ކާމިޔާބުކޮށް, 6 އެސިސްޓު ފޯރުކޮށްދީފައެވެ.
- ޖައޯ ޕެޑްރޯ: ބްރައިޓަންއަށް ކުޅެމުން އަންނަ ޕެޑްރޯ މި ދިޔަ ސީޒަނުގައި ދެއްކި މޮޅު ކުޅުމުގެ ސަބަބުން އޭނާ ވަނީ މި ވަގުތު ދުނިޔޭގައި ހުރި އެންމެ ހުނަރުވެެރި ޒުވާން ކުޅުންތެރިންގެ ތެރޭގައި ހިމެނިފައެވެ. ބްރައިޓަންގެ ފަރާތުން ދަށް ކުޅުމެއް ފެނިގެންދިޔަ ކަމުގައިވިއަސް ޕެޑްރޯ ވަނީ އެ ކްލަބަށް 15 ލަނޑު ޖަހައިދީ, 3 އެސިސްޓު ފޯރުކޮށްދީފައެވެ.
- މައިކަލް އޮލީސޭ: މި ދިޔަ ސީޒަނުގައި ޕްރިމިއާ ލީގުގައި އެންމެ ތަފާތު ދެއްކި އެއް ޓީމު ކަމުގައިވާ ކްރިސްޓަލް ޕެލޭސްއަށް ކުޅުނު އޮލީސޭ ވަނީ އެ ކްލަބަށް ކުޅެދިން އެންމެ 19 މެޗުގައި 10 ލަނޑު ކާމިޔާބު ކޮށް, 6 އެސިސްޓު ފޯރުކޮށްދީފައެވެ. އޮލީސޭގެ ފަރާތުން ފެނިގެންދިޔަ މޮޅު ކުޅުމުގެ ސަބަބުން ފުޓުބޯޅައިގެ ގަދަ ބާރެއް ކަމުގައިވާ ބަޔާން މިއުނިކުން ވަނީ މި ހޫނު މޫސުމުގެ ޓްރާންސްފާ ވިންޑޯގައި އޭނާގެ ސޮއި ހޯދާ, އޭނާ އެ ކްލަބަށް ގެންގޮސްފައެވެ.
ޕީއެފްއޭ ޔަންގް ޕްލޭޔާގެ އެވޯޑު ދިނުމުގެ ހަފްލާ އޮތީ މި މަހުގެ 20 ވަނަ ދުވަހުއެވެ. މި އެވޯޑު ހަވާލުކުރާ ރަސްމިއްޔާތި ބޭއްވުމަށް ހަމަޖެހިފައިވަނީ އިނގިރޭސި ވިލާތުގެ ސިޓީއެއް ކަމުގައިވާ މެންޗެސްޓާގައެވެ.
