ރާއްޖެއަށް ކުރަމުންދާ ގަދަ ވިއްސާރައިގެ ސަބަބުން ބައެއް އާރްޓީއެލް ރޫޓްތައް ކެންސަލްވުން އެކަށީގެންވާކަމަށް މޯލްޑީވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) އިން ބުނެފިއެވެ.
ހުޅަނގު މޫސުމާއިގުޅިގެން މިދުވަސްކޮޅު ދިވެހި ރާއްޖޭގެ ބޮޑުބަޔަކަށް ބޯކޮށް ވާރެވެހި، ވިލާގަނޑުގައި 40 މޭލައި 45 މޭލާއި ދެމެދަށްވައިބާރުވާ، ކަނޑުތައް ގަދަވާނެކަމަށް ލަފާކޮށް މޫސުމާއިބެހޭ ޤައުމީ އިދާރާއިން ދަތުރުކުރުމުގައި ސަމާލުވެ ރައްކާތެރިވުމަށް ވަނީ އިލްތިމާސްކޮށްފައެވެ.
އެހެންކަމުން އެމްޓީސީސީގެ ބެއެއް ފެރީ ރޫޓުތައް ކެންސަލްވުން އެކަށީގެންވާކަމަށް އެމްޓީސީސީއިން ބުނެފައިވެއެވެ. ނަމަވެސް، މޫސުން ތަންދޭ ވަރަކަށް ބަލައި، ފެރީ ދަތުރުތައް އެއްކޮށް ކެންސަލްނުކޮށް ކިރިއަށް ގެންދެވޭތޯ ބަލާނެކަމަށް އެމްޓީސީސީއިން ބުނެފައިވެއެވެ.
މީގެ އިތުރުން، ކެންސަލްކުރެވޭ އާރްޓީއެލް ފެރީ ދަތުރުތަކުގެ ޓިކެޓުތައް އެހެން ދުވަހަކަށް ބަދަލުކުރެވޭނެމަށްވެސް އެކުންފުނިން ބުނެއެވެ.
ދަތުރުތައް ކެންސަލްވުމާއި ގުޅިގެން ދިމާވެދާނެ ދަތިތަކަށް އެމްޓީސީސީއިން ވަނީ މަޢާފަށް އެދިވަޑައިގެންފައެވެ.
