ރާއްޖެއަށް މިހާރު ކުރިމަތިވެފައިވާ ވިއްސާރައިގެ ސަބަބުން ފެންބޮޑުވެ، ވައިގަދަވުމުގެ ސަބަބުން ގެއްލުން ލިބުނު ކަމަށް 9 ރަށަކުން ރިޕޯޓުކޮށްފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮއްފިއެވެ.
އޭގެ ތެރޭގައި، ސ. މަރަދު، ސ. ފޭދޫ، ސ. ހިތަދޫ، ގއ. ދެއްވަދޫ، ޅ. ނައިފަރު، ޅ. ކުރެންދޫ، ކުޅުދުއްފުށި ސިޓީ، ހއ. ބާރަށް، އަދި ހއ. ދިއްދޫ ހިމެނެއެވެ.
އެންޑީއެމްއޭއިން ވިދާޅުވީ މި ވިއްސާރައިގެ ސަބަބުން ރަށްރަށަށް ލިބެމުންދާ ގެއްލުންތައް ގާތުން މޮނިޓަރކުރަމުންދާ ކަމަށެވެ. އަދި މިހާތަނަށް އެއްވެސް ރަށެއްގައި އާއިލާއެއް ވަގުތީ ހިޔާވަހިކަމަށް ބަދަލުކުރަންޖެހޭ ފަދަ ހާލަތެއް މެދުވެރިވެފައިނުވާކަންވެސް އެ އޮތޯރިޓީން ފާހަގަކޮށްފައިވެއެވެ.
މޯލްޑިވްސް މީޓިއޮރޮލޮޖިކަލް ސަރވިސްއިން މި ހަފްތާގެ ކުރީކޮޅު ނެރުނު މޫސުމާ ބެހޭ ބަޔާނެއްގައި ވަނީ އޯގަސްޓް 11 އިން ފެށިގެން ހުޅަނގު މޫސުމާ ގުޅިގެން ރާއްޖޭގެ ބޮޑުބަޔަކަށް މޫސުން ގޯސްވާނެކަމަށް ބަޔާންކުރައްވާފައެވެ. ކުރިއަށް އޮތް ދުވަސްތަކުގައި ފުޅާ ދާއިރާއެއްގައި ވާރޭވެހުމާއި، ގުގުރުމާއި، ކަނޑު ގަދަވުމާއި، އަދި ގަޑިއަކަށް 40-45 މޭލުގެ ބާރުމިނުގައި ވައިޖެހުން އެކަށީގެންވާނެކަމަށް މެޓްއުފީހުން ވިދާޅުވެފައިވެއެވެ.
މިކަމާ ގުޅިގެން، އެންޑީއެމްއޭއިން ވަނީ ރައްކާތެރިކަމަށް އާންމުންނަށް ސަލާމަތީ އިރުޝާދުތަކެއް ދީފައެވެ. އޭގެ ތެރޭގައި ފެންބޮޑުވުމަށް ތައްޔާރުވުން، ފެން ވަނުމުން ގެދޮރު ރައްކާތެރިކުރުމަށް ވެލިބަސްތާ ބޭނުންކުރުން، ގޭތެރޭގެ ފަރުނީޗަރު ރައްކާތެރިކުރުން, ބޭރުގައި ހުންނަ ތަކެތި ވައިގައި ޖެހިގެން ނުދާނެގޮތަކަށް ރައްކާތެރިކުރުން، ގަދަ ވައިން ރައްކާތެރިކުރުމަށް ފުރާޅުތައް ވަރުގަދަކުރުން, ބޭނުން ނުކުރާއިރު ކަރަންޓު ތަކެތި ނިއްވާލުން, ޒަރޫރީ ހާލަތްތަކުގައި ނޫނީ ކަނޑު ދަތުރުކޮށް- މޫސުމާ ބެހޭ އަޕްޑޭޓްތަކަށް ސަމާލުކަން ދިނުން ހިމެނެއެވެ.
