ޕްރޮފެޝަނަލް ފުޓްބޯލް އެސޯސިއޭޝަން (ޕީއެފްއޭ) އިން ކޮންމެ އަހަރަކު ވެސް ހޮވަމުން އަންނަ "ޕީއެފްއޭ ޕްލޭޔާ އޮފް ދި އިޔަރ" އެވާޑަށް ނޮމިނޭޓްވި 6 ކުޅުންތެރިންގެ ނަން އިއުލާނުކޮށްފިއެވެ.
ޕީއެފްއޭއިން ނެރުނު ލިސްޓުގައި ހިމެނޭ 6 ކުޅުންތެރިންނަކީ:
- ފިލް ފޯޑެން: މެންޗެސްޓާ ސިޓީއަށް ކުޅެމުން އަންނަ ޒުވާން ފޯޑެން ވަނީ މި ދިޔަ ސީޒަނުގައި ސިޓީއަށް ލިބުނު ކާމިޔާބީތަކުގައި މުހިއްމު ދައުރެއް އަދާކޮށްފައެވެ. އޭނާ ވަނީ ސިޓީއަށް 24 ލަނޑު ޖަހައިދީ 11 އެސިސްޓު ފޯރުކޮށްދީފައެވެ.
- އާލިން ހާލަންޑް: އޭނާގެ ފުރަތަމަ ސީޒަނެކޭ އެއްފަދައިން ހާލަންޑް ވަނީ މި ދިޔަ ސީޒަނުގައި ވެސް ތަފާތު ކުޅުމެއްް ދައްކާފައެވެ. އެ ގޮތުން އޭނާ ވަނީ ޖެހިޖެހިގެން ދެވަނަ އަހަރަށް ޕްރިމިއާ ލީގުގެ ޓޮޕް ސްކޯރާރ ކަމުގެ އެވޯޑު ހާސިލުކޮށްފައެވެ. އޭނާ ވަނީ ސިޓީއަށް 33 ލަނޑު ޖަހައިދީ, 6 އެސިސްޓު ފޯރުކޮށްދީފައެވެ.
- މާޓިން އޮޑެގާޑް: އާސެނަލްގެ މެދުތެރޭގެ "ތަނބު" ކަމުގައިވާ އޮޑެގާޑް ވަނީ މި ދިޔަ ސީޒަނުގައި މޮޅު ކުޅުމެއް ދައްކާފައެވެ. އާސެނަލްއަށް ޓްރޮފޚއަކާ ހަމައަށް ވާސިލުނުވެވުނު ކަމުގައިވިއަސް އޮޑެގާޑް ވަނީ އޭނާގެ ފެންވަރު އެ ޓީމުގެ މިޑްފީލްޑުގައި ވަރަށް ރަނގަޅަށް ދައްކާލާފައެވެ. އޭނާ ވަނީ އާސެނަލްއަށް 11 ލަނޑު ކާމިޔާބުކޮށް, 11 އެސިސްޓު ފޯރުކޮށްދީފައެވެ.
- ކޯލް ޕާމާ: މި ދިޔަ ސީޒަނުގައި މެންޗެސްޓާ ސިޓީއިން ޗެލްސީއަށް ސޮއިކުރި ޕާމާ ވަނީ އާދަޔާހިލާފު މޮޅު ކުޅުމެއް ދައްކާފައެވެ. އޭނާ ވަނީ މި ދިޔަ ސީޒަނުގައި ޗެލްސީއަށް 24 ލަނޑު ކާމިޔާބު ކޮށްދީ, 13 އެސިސްޓު ފޯރުކޮށްދީފައެވެ. ޕާމާއަކީ ޕީއެފްއޭ ޕްލޭޔާ އޮފް ދަ އިޔާ އެވޯޑުގެ އިތުރުން ޕީއެފްއޭ ޔަންގް ޕްލޭޔާއަށް ނޮމިނޭޓްވި ހަމައެކަނި ކުޅުންތެރިޔާއެވެ.
- ރޮޑްރީ: ޖެހިޖެހިގެން ހަތަރު ޕްރިމިއާ ލީގު ކާމިޔާބު ކުރި މެންޗެސްޓާ ސިޓީގެ "މައިބަދަ" ކަމުގައިވާ ރޮޑްރީ ވަނީ މި ދިޔަ ސީޒަނުގައި ވެސް އޭނާގެ ހުނަރުވެރިކަން ދައްކާލާފައެވެ. ޑިފެންޑް ކުރުމުގެ މަސައްކަތުގެ އިތުރުން ރޮޑްރީ ވަނީ ޓީމުގެ ހަމަލާތަކުގައި ވެސް އޭނާގެ ހިއްސާ އިތުރު ކޮށްފައެވެ. އެ ގޮތުން އޭނާ ވަނީ ސިޓީއަށް 9 ލަނޑު ޖަހައިދީ, 11 އެސިސްޓު ފޯރުކޮށްދީފައެވެ.
- އޮލީ ވޮޓްކިންސް: މި ދިޔަ ސީޒަނުގައި އެންމެ ތަފާތު ކުޅުމެއް ދެއްކޮ އެއް ޓީމު ކަމުގައިވާ އެސްޓަން ވިލާގެ ފޯވާޑް ލައިނުގެ އާރުކާޓީ ކަމުގައިވާ ވޮޓްކިންސް ވަނީ އޭނާ ދެއްކި މޮޅު ކުޅުމުގެ ސަބަބުން ދުނިޔޭގެ އެންމެ މޮޅު ސްޓްރައިކަރުންގެ ތެރޭގައި އޭނާގެ ނަން ހިމަނާލާފައެވެ. ވޮޓްކިންސް ވަނީ އެސްޓަން ވިލާއަށް 19 ލަނޑު ކާމިޔާބު ކޮށް, 13 އެސިސްޓު ފޯރުކޮށްދީފައެވެ.
ޕީއެފްއޭ ޕްލޭޔާ އޮފް ދަ އިޔާ އެވޯޑު ދިނުމުގެ ހަފްލާ އޮތީ މި މަހުގެ 20 ވަނަ ދުވަހުއެވެ. މި އެވޯޑު ހަވާލުކުރާ ރަސްމިއްޔާތު ބޭއްވުމަށް ހަމަޖެހިފައިވަނީ އިނގިރޭސި ވިލާތުގެ ސިޓީއެއް ކަމުގައިވާ މެންޗެސްޓާގައެވެ.
