ގުދުސް (އޮގަސްޓް 13) - ޒަޔަނިސްޓް އިޒްރޭލުގެ ހައްދުފަހަނައެޅި ކަނާތުފިޔައިގެ ގައުމީ ސަލާމަތީ މިނިސްޓަރު އިޓަމާ ބެން ގްވީރު އެތައް ސަތޭކަ ޔަހޫދީން ގޮވައިގެން މާތްވެގެންވާ ގުދުސްގެ އަލް އަގްސާ މިސްކިތަށް މިއަދު ވަދެ އެތަނުގެ ހުރުމަތްކަނޑައިފިއެވެ.
ބެން ގްވީރާއި ޔަހޫދީން މަސްޖިދުލް އަގްސާއަށް ވަދެ ހުރުމަތްކެނޑި މައްސަލަ އަރަބި އިސްލާމީ ބައެއް ޤައުމުތަކުން ވަނީ ކުއްވެރިކޮށް ބަޔާންވެސް ނެރެފައެވެ.
ޢަރަބި ނޫސްތަކުން ބުނެފައިވާ ގޮތުގައި ހައްދުފަހަނައެޅި ބެން ގްވީރު އަލް އަގްސާ މިސްކިތުގެ ކޮމްޕައުންޑަށް ވަދެ ޒަޔަނިސްޓް ޔަހޫދީން ކޮށްއުޅޭ އަޅުކަމެއް ވަނީ ކޮށްފައެވެ.
އިސްރާއީލު ސަރުކާރުން މީގެ ކުރިން ވަނީ އަގްސާ މިސްކިތުގެ ކޮމްޕައުންޑުގައި ޔަހޫދީން އަޅުކަން ކުރުން މަނާކޮށްފައެވެ. އެކަމަކު މިއަދު ބެން ގްވީރް ގިނަ އަދަދެއްގެ ޔަހޫދީން ގޮވައިގެން އަަގްސާ މިސްކިތަށް ވަނީ ހައްދުފަހަނައެޅ އިޒްރޭލުގެ ފުލުހުންނާއެކުއެވެ.
އަގްސާ މިސްކިތުގެ ހުރުމަށްކެނޑުމަށްފަހު ބެން ގްވީރު ވަނީ ވީޑިއޯއެއް އާންމުކޮށް ޣައްޒާގައި "ހަމާސް ބަލި" ކުރުރާނެ ކަމަށް ހުވާކޮށްފަ އެވެ.
މާތް ވެގެންވާ އަގްސާ މިސްކިތަކީ މުސްލިމުންގެ ފުރަތަމަ ޤިބްލައެވެ. އަގްސާ މިސްކިތް ހުންނަ ގުދުސްއަކީ އިސްލާމް ދީނުގައި ތިންވަނައަށް އެންމެ މާތް ބިމާއި ފަލަސްތީނުގެ ގައުމީ އައިޑެންޓިޓީގެ ރަމްޒެއް ނަމަވެސް، ޔަހޫދީން ދައުވާ ކުރާ ގޮތުގައި ކުރިން މިތަނުގައި ހުރީ ޔަހޫދީންގެ މުގައްދަސް ފައްޅިއެކެވެ. އެކަމަކު މީލާދީން 70 ވަނަ އަހަރު ރޯމަނުން މިފަައްޅި ހަލާކު ކޮށްލީކަމަށް ހަރުކަށި ޔަހޫދީން ވަކާލާތު ކުރެއެވެ.
މިއަދު ހެނދުނު ބެން ގްވީރާއި އިތުރު 2،250 އެއްހައި ޔަހޫދީން އަގްސާ މިސްކިތުގެ ކޮމްޕައުންޑް ތެރެއިން ހިނގާފައި ދިޔައީ ޔަހޫދީ ލަވަތައް ކިޔަމުންކަމަށް ސަރަހައްދުގެ ބަލަހައްޓަމުން އަންނަ އުރުދުންގެ ޖަމާއަތެއް ކަމަށްވާ ވަގުފްގެ އޮފިޝަލަކު އަލް އަރަބް ނިއުސްއަށް މައުލޫމާތު ދީފައިވެއެވެ.
މަސްޖިދުލް އަގްސާ އާއި ގުދުސްގެ މިނިވަންކަމަށްޓަކައި ޖިހާދު ކުރަމުން އަންނަ ފަލަސްތީނުގެ މުޖާހިދުންނަކީ ޓެރަރިސްޓުންކަމަށް އިޒްރޭލާއި އެމެރިކާއިން ލޭބަލްކޮށްފައިވާއިރު، މިދިޔަ އަހަރުގެ އޮކްޓޫބަރު 8 ވަނަ ދުވަހުން ފެށިގެން އިޒްރޭލުން ގެންދަނީ ފަލަސްތީނުގެ ޣައްޒާއަށް އަރައި ޤަތުލް އާންމުތައް ހިންގަމުންނެވެ. އިޒްރޭލުން ހިންގަމުން އަންނަ ޤަތުލް އާންމުތަކަށް އެމެރިކާއިން ފުރިހަމައަށް އެއްބާރުލުން ދެމުން އަންނައިރު، މިޤަތުލް އާންމުތައް ހުއްޓުވުމުގައި ޢަރަބި އިސްލާމީ ޤައުމުތައް ވަނީ ފެއިލްވެފައެވެ.
