ވޭތުވެދިޔަ 24 ގަޑިއިރުގެ ތެރޭގައި އެންމެ ގިނައިން ވާރޭވެހިފައިވަނީ މާލެއަށް ކަމަށް މޫސުމާ ބެހޭ ޤައުމީ އިދާރާއިން ހާމަކުރެއްވައިފިއެވެ.
މޫސުމާ ބެހޭ ޤައުމީ އިދާރާއިން ޢާންމުކުރެއްވި ތަފާސްހިސާބުތަކުން ދައްކާގޮތުގައި، އަންގާރަ ދުވަހުގެ ހެނދުނު 8:00 އިން ބުދަ ދުވަހުގެ ހެނދުނު 8:00 އާ ހަމައަށް، މާލެއަށް 89.4 މިލިމީޓަރުގެ ވާރޭ ވެހިފައިވެއެވެ. ދެވަނައަށް އެންމެ ގިނައިން ވާރޭވެހިފައިވާ އއ. ތޮއްޑޫއަށް 70.6 މިލިމީޓަރުގެ ވާރޭ ވެހިފައިވެއެވެ.
މީގެ އިތުރުން، އެ އިދާރާއިން މަޢުލޫމާތު ދެއްވާފައިވާ ގޮތުގައި، ފާއިތުވި 24 ގަޑިއިރުގެ ތެރޭގައި އެންމެ ވައިގަދަވެފައިވާކަމަށް ރެކޯޑުކުރެވިފައިވަނީ ހދ. ހަނިމާދޫ އާއި މާލޭގައެވެ. މިގޮތުން ވައިގެ ބާރުމިން ގަޑިއަކު 47 މޭލަށް އަރާފައިވެއެވެ.
ކުރިއަށް އޮތް 24 ގަޑިއިރުގެ ތެރޭގައި އުތުރާއި މެދުރާއްޖެތެރޭގެ އަތޮޅުތަކަށް ވައިގަދަވެ، ކަނޑުތައް ގަދަވާނެކަމަށްވެސް މޫސުމާ ބެހޭ ޤައުމީ އިދާރާއިން ވިދާޅުވިއެވެ. މީގެއިތުރުން، މިއަދުގެ މެންދުރުފަހުން ފެށިގެން ދެކުނުގެ ރަށްތަކަށްވެސް ވައިގަދަވުމަކީ އެކަށީގެންވާ ކަމެކެވެ. އަދި ދެކުނުގެ އަތޮޅުތަކަށް ބޯކޮށް ވާރޭވެހުމާއެކު، ރާއްޖޭގެ އެކި ސަރަޙައްދުތަކަށް ރާޅު އެރުމަކީވެސް އެކަށީގެންވާ ކަމެއްކަމުގައި އެ އިދާރާއިން ލަފާކުރައްވައެވެ.
މި ދުވަސްވަރަކީ މޫސުން ގޯސްވެފައިވާ ދުވަސްވަރެއްކަމަށްވުމުން އެންމެހައި ރައްޔިތުން މޫސުމަށް ޚާއްޞަ ސަމާލުކަމެއް ދެއްވުމަށް މޫސުމާ ބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ. ކަނޑުތައް ގަދަވެ، ވައިގެ އަސަރު ގަދަވުމުގެ ސަބަބުން ހއ އަތުޅުން ފެށިގެން އއ އަތޮޅާ ހަމައަށް އަދިވެސްވަނީ ރިނދޫ ސަމާލު ނެރެފައެވެ.
