އިސްރާއީލުގެ ނެޝަނަލް ސެކިއުޓީ ވަޒީރު އިތަމާރު ބެންގަވީރު އަދި އިސްރާއީލު ސަރުކާރުގެ އޮފިޝަލުން އަލް އަޤްޞާ މިސްކިތަށް ވަދެގަތުން ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
މިއީ މުސްލިމް އުންމަތުގެ އެންމެ މަތިވެރި ތަންތަނުގެ ތެރެއިން އެއްތަނުގެ ޙުރުމަތް ކަނޑާލުމުގެ ޢަމަލެއްކަމަށް ޙާރިޖީ ވުޒާރާއިން ނެރުނު ބަޔާނެއްގައި ވިދާޅުވެފައިވެއެވެ.
އިތަމާރު ބެންގަވީރާއި އުތުރު ދެ މިނިސްޓަރުންނާއި ކެނެސެޓްގެ މެންބަރުންނާ އެއްކޮށް ޖުމްލަ 2،250 އަށް ވުރެ ގިނަ ޒަޔަނިސްޓުން އޮގަސްޓް 13 ގައި މަސްޖިދުލް އަޤްޞާގެ ހަރަމަށް ވަދެގަތް ކަމަށް ރިޕޯޓުތަކުން ބުނެއެވެ. އިސްރާއީލުން އަލްއަޤްޞާ މިސްކިތަށް މިފަދައިން ތަކުރާރުކޮށް ވަދެގަތުމަކީ އެ ސަރަޙައްދުގެ ސުލްޙަވެރިކަމާއި ހަމަޖެހުން ޤާއިމުކުރުމުގެ އުންމީދުތަކަށް ހުރަސްއާާޅާނެ ކަމެއްކަމާމެދު ދިވެހިރާއްޖެ ވަރަށް ބޮޑަށް ކަންބޮޑުވާކަމަށް ޚާރިޖީ ވުޒާރާއިން ވިދާޅުވިއެވެ.
ޚާރިޖީ ވުޒާރާއިން އިތުރަށް ވިދާޅުވީ ދިވެހި ސަރުކާރާއި ރައްޔިތުން ފަލަސްޠީނުގެ ރައްޔިތުންނާއެކު އެއްބައިވަންތަކަމާއެކު ތިބޭނެކަންމަށެވެ. އަދި މި މައްސަލައަށް ސުލްޙަވެރި އަދި ދެމެހެއްޓެނިވި ޙައްލެއް ހޯދުމަށް ބައިނަލްއަޤްވާމީ މުޖުތަމަޢުއަށް ޚާރިޖީ ވުޒާރާއިން ގޮވާލާފައިވެއެވެ.
މަސްޖިދުލް އަޤްޞާއަށް ވަދެގަނެ ލަވަކިޔައި މުސްލިމުންނަށް މަލާމާތްކޮށް، ފުރައްސާރަ ކުރުމުގައި ބެންގަވީރުގެ އިތުރުން އިސްރާއީލުގެ އެހެން ބައެއް ވަޒީރުންވެސް ވަނީ ބައިވެރިވެވަޑައިގެންފައެވެ. އަދި މިސްކުތު ބިމުގައި ތިބި ފަލަސްތީނުގެ ރައްޔިތުން ކޮޅުފައިންތަޅައި ބޭރުކޮށްފައި ވާކަމަށް ރިޕޯޓުތަކުން ބުނެއެވެ.
އިތަމާރު ބޭންގަވީރުގެ މި އަމަލުތަކާމެދު ކަންބޮޑުވެވަޑައިގަންނަވާ ކަމަށް ޔޫރަޕިއަން ޔޫނިއަންގެ ޚާރިޖީ ސިޔާސަތާ ބެހޭ މުޝީރު، ޖޯސެފް ބޮރެލް ވަނީ ވިދާޅުވެފައެވެ. އަދި އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން ވަނީ ބޭންގަވީރުގެ މި އަމަލު ކުއްވެރި ކުރައްވާފައެވެ.
