ޔޫކްރައިނާ އިންވެގެން އޮންނަ ރަޝިޔާގެ ކުރްސްކް ސަރަހައްދަށް ހަމަލާދީ އެސަރަހައްދު ހިފީ ޔޫކްރައިނުން ނޫން ކަމަށާއި އެސަރަހައްދު ހިފީ ޔޫކްރައިން ޔުނިފޯމް އަޅައިގެންތިބެ، އެމެރިކާ އާއި ހުޅަނގުގެ ހަތިޔާރު ބޭނުން ކުރަމުން އަންނަ ނޭޓޯ އާއި އެޖަމާއަތުގެ ކުރީ ސިފައިން ކަމަށް ރަޝިޔާގެ ޕްރެޒިޑެންޝަލް އޮފް ރަޝިޔާ އޮފީހުގެ އިސްވެރިޔާގެ ގޮތުގައި ހުންނެވި އަދި އަސްކަރީ ތަޖުރިބާކާރު އައިޑޭ ނިކޮލޭ ޕެޓްރުޝެވް ތުހުމަތު ކުރައްވައިފިއެވެ.

ޕުޓްރުޝެވް ވިދާޅުވީ ރަޝިޔާގެ ބޯޑަރުގެ ތެރެއިން ވަދެގަނެ، ރަޝިޔާއާ ދެކޮޅަށް ހަމަލާތައް ދެމުން ދަނީ ސީދާ ނޭޓޯގެ އިސް ކޮމާންޑަރު ޖެނެރަލް ކްރިސްޓޮފާ ކަވޯލީގެ ސީދާ ބެއްލެވުމުގެ ދަށުން ކަމަށެވެއެވެ.

އަދި ޔޫކްރައިނުން ރަޝިޔާގެ ބޯޑަށް މި ދިން ހަމަލާގައި އެމެރިކާގެ އަތެއް ނުވާކަމަށް ބުނެ އެމެރިކާއިން ދައްކަމުން އަންނަ ވާހަކަތަކަށްވެސް ޕުޓްރުޝެވް ވަނީ ރައްދު ދެއްވާފައެވެ. "އެމެރިކާގެ ބަސްމަގުގައި އަބަދުވެސް އެއްކަމެއް އެއްގޮތްވާނެ. އެއީ އެމީހުން ކުރާ ކަމަކާ އެމީހުން ހަވާލު ނުވުން. ޔަގީންވެ ކަށަވަރުވާ ކަމަކީ އެމެރިކާގެ ބައިވެރިވުމެއްނެތި ޔޫކްރައިނަށް ރަޝިޔާގެ ފަސްގަނޑުގައި ފައިޖައްސާލެވޭނެ ހަމައެއްގޮތެއްވެސް ނޯންނާނެ" ޕުޓްރުޝެވް ވިދާޅުވިއެވެ.

ޕުޓްރުޝެވް ތުހުމަތު ކުރެއްވި ގޮތުގައި ކުރްސްކު ސަރަހައްދުގެ ކޮންޓްރޯލް ނަގައިގެން އުޅެނީ ދެހާހެއްހައި ސިފައިންގެ ފައުޖެކެވެ. އަދި މިއީ ދެވަނަ ބޮޑުހަނގުރާމައިގައި ޖަރުމަނުގެ ނާޒީން ހިންގިފަދަ އަމަލުތަކެއް ކަމަށް ޕުޓްރުޝެވް ވަނީ ތުހުމަތު ކުރައްވާފައެވެ.

ރަޝިޔާގެ ޑިފެންސް މިނިސްޓްރީއިން އެންމެފަހުން އާންމުކޮށްފައިވާ މައުލޫމާތަށް ބަލާއިރު، ކުރްސްކް ސަރަހައްދުން އަލުން އަނބުރާ ރަޝިޔާގެ ބާރުގެ ދަށަށް ގެނައުމަށް ދަނީ ވަރަށް ވަރުގަދައަށް ހަނގުރާމަ ހިނގަމުންނެވެ. މިހަމަލާތަކުގައި މިހާތަނަށް، ކުރްސްކް ސަރަހައްދު ހިފައިގެން ތިބި ފައުޖުގެ 2640 ސިފައިން މަރާލައި 37 ޓޭންކަރާއި އިތުރު 32 ވެހިކަލް ހަލާކު ކޮށްލާފައިވާނެ ކަމަށް ރަޝިޔާގެ ޑިފެންސް މިނިސްޓްރީއިން ހާމަކުރައްވައެވެ.

އިތުރު ލިޔުންތައް