ބުރާސްފަތި ދުވަހު ފެށުމަށް ހަމަޖެހިފައިވާ ޣައްޒާގެ ހަނގުރާމަ ހުއްޓުވުމާއި ރަހީނުން ބަދަލުކުރުމުގެ މަޝްވަރާތަކުގައި ބައިވެރިނުވާނެ ކަމަށް ހަމާސްއިން އިއުލާނުކޮށްފިއެވެ.
ހަމާސްގެ ލީޑަރެއްކަމުގައިވާ ސުހައިލް ހިންދީ ބުނެފައިވަނީ، އެމެރިކާގެ ރައީސް ޖޯ ބައިޑެންގެ އެހީތެރިކަމާއެކު ޖުލައި 2 ގައި ހުށަހެޅުނު ހުށަހެޅުމުގެ ދަށުން ވެވުނު އެއްބަސްވުންތަކާމެދު އިސްރާއީލުން ސާފު އިލްތިޒާމެއް ނުދޭތީ، ދޯހާގައި ނުވަތަ ކައިރޯގައި ބޭއްވޭ މަޝްވަރާތަކުގައި ބައިވެރިނުވާނެ ކަމަށެވެ.
މީގެ އިތުރުން، ހަމާސްއިން ބައިޑެންގެ އެހީތެރިކަމާއެކު ހުށަހެޅުނު ހުށަހެޅުން ތަންފީޒުކުރުމަށް ތަފްސީލީ ޕްލޭނެއް ޣައްޒާގެ ހަނގުރާމަ ހުއްޓުވުމުގެ މެދުވެރިންގެ ފަރާތުން ބޭނުންވާކަމަށް ބުނެފައިވެއެވެ. މި ޕްލޭންގައި ހިމެނެނީ މަރުހަލާތަކަކަށް ބަހާލައިގެން ކުރިއަށްދާ މަސައްކަތްތަކެކެވެ. އެންމެ ފުރަތަމަ 6 ހަފްތާގެ ހަނގުރާމަ ހުއްޓުވުމަކާއި، ހަމާސްއިން އަތުލައިގެންފައިވާ ޔަހޫދީންތަކާއި އިސްރާއީލިން ނަހަމަގޮތުގައި ބަންދު ކޮއްފައި ތިބި ފަލަސްތީނުގެ ރައްޔިތުން އެކުއެކީ ދޫކޮށްލުމާއި، އަދި އިސްރާއީލު ޣައްޒާއިން އަނބުރާ ނުކުތުން ހިމެނެއެވެ.
ނަމަވެސް، ޓެހެރާންގައި ހަމާސްގެ ލީޑަރު އިސްމާޢީލް ހަނިއްޔާ އިސްރާއީލުން ޝަހީދުކޮއްލުމާ ގުޅިގެން މަޝްވަރާތައް ހުއްޓުމަކަށް އައިސް، ސުލްޙައަށް ކުރެވޭ މަސައްކަތްތައް ވަނީ ފެނަށް ގޮސްފައެވެ.
މިސްރުގެ، ގަތަރުގެ އަދި އެމެރިކާގެ މެދުވެރިން އިތުރު ލަސްވުމެއް ނެތި މައްސަލަ ހައްލުކުރުމަށް ގޮވާލާފައިވީ ނަމަވެސް، ހަމާސްއިން މަޝްވަރާތަކުގައި އަލުން ބައިވެރިވުމުގެ ކުރިން އިތުރު ހަރުދަނާ ޔަގީންކަން ދިނުމަށް ވަނީ ގޮވާލައިފައެވެ.
