ފާއިތުވެދިޔަ ބުދަ ދުވަހު ބަޔަކު ތޫނު އެއްޗަކުން ހަމާލީ ޒަހަމްކޮށްލި ލަމީން ޔަމާލްގެ ބައްޕަ, މުނިރް ނަސްރޯއީގެ ހާލަތު މިހާރު ރަނގަޅު ކަމަށް ސްޕެއިންގެ މީޑިއާތަކުން ހާމަކޮށްފިއެވެ.
ފުޓުބޯޅައިގައި އަރަމުން އަންނަ އެންމެ އަލިގަދަ އެއް ތަރި ކަމުގައިވާ 17 އަހަރުގެ ޔަމާލްގެ ބައްޕަ, މުނިރްއަށް ބަޔަކު ހަމަލާދީ ޒަހަމްކޮށްލީ މަޓާރޯ ކިޔުނު އަވަށެއްގެ ޕާކިން ލޮޓެއްގައެވެ. މުނިރް ޒަހަމްވުމާއެކު އޭނާ ވަނީ ވަގުތުން ހޮސްޕިޓަލަށް ގެންގޮސް ފަރުވާ ދޭން ފަށާފައެވެ.
މުނިރް މިހާރު ފަރުވާ ހޯދަމުންދާ ހޮސްޕިޓަލް ކަމުގައިވާ ޖާމަނީ އައި ޓްރިއަސް ޕުޔޯލް ޔުނިވާސިޓީ ހޮސްޕިޓަލުގައި އެނދުމަތިވެ އޮވެ, އޭނާ ވަނީ ސްޕެއިންގެ މީޑިއާއެއް ކަމުގައިވާ އެލް ޗިރިންގުއިޓޯއަށް އޭނާއަށް ކުރިމަތިވި ބިރުވެރި ހާދިސާއާ ބެހޭ ގޮތުން ވާހަކަދައްކާފައެވެ. މުނިރް ވަނީ, އޭނާއަށް ހަމަލާލިން މީހުންނަށް އެކަށީގެންވާ އަދަބު ލިބިގެންދާނެ ކަމަށް އުއްމީދު ކުރާ ކަމަށް ބުނެފައެވެ.
"އަހަރެން ހުރީ ވަރަށް ބިރުން. މަރުގެ ތުންފަތް މައްޗަށް އެރުނީމަ ކޮންމެ އިންސާނަކަށް ވެސް ވާނީ އެހެން. އަހަރެންގެ ހާލު މިހާރު އަންނަނީ ރަނގަޅުވަމުން. އުއްމީދު ކުރަން ކަމާ ބެހޭ ފަރާތްތަކުން އަހަންނަށް ހަމަލާދިން ފަރާތްތަކަށް ހައްގުވާ އަދަބު ދޭނެ ކަމަށް" އެލް ޗިރިންގުއިޓޯއަށް ދިން ބަސްދީގަތުމުގައި މުނިރް ބުންޏެވެ.
ބާސެލޯނާއާއެކު ފުޓުބޯޅައިގެ އާ ސީޒަނަށް ތައްޔާރުވަމުން އަންނަ ލަމީން ޔަމާލް ވަނީ ބުރާސްފަތި ދުވަހު ހަވީރު އޭނާގެ ބައްޕައަށް ޒިޔާރަތް ކޮށްފައެވެ. ޔަމާލް މިހާރު ތައްޔާރުވަމުން އަންނަނީ ހޮނިހިރު ދުވަހު ވެލެންސިއާއާ ދެކޮޅަށް ކުޅޭ, ސްޕެނިޝް ލަލީގާގެ އާ ސީޒަނުގެ ފުރަތަމަ މެޗަށެވެ.
