އިނގިރޭސި ވިލާތުގެ ޑިފެންޑަރު ބެން ޗިލްވެލް ވިއްކާލުމުގެ މަސައްކަތް ޗެލްސީއިން ފަށައިފިއެވެ.
އިތުބާރުހުރި އިޓަލީގެ ފުޓުބޯޅަ ޖާނަލިސްޓް ފަބްރީޒިއޯ ރޮމާނޯ ހާމަކުރި ގޮތުގައި ޗެލްސީއިން އަންނަނީ ކުރިއަށް އޮތް 15 ދުވަސް ތެރޭގައި ޗިލްވެލް އެހެން ކްލަބަކަށް ވިއްކާލުމަށް ޓަކައި މަސައްކަތް ކުރަމުންނެވެ.
އައު ސީޒަނަށް ޗެލްސީގެ ކޯޗުކަމުގެ މަގާމާ ހަވާލުވި އެންޒޯ މެރެސްކާ ވަނީ ޗެލްސީ ދޫކޮށް ޗިލްވެލް އެހެން ކްލަބަކަށް ދިއުމުގެ ފުރުސަތު ބޮޑު ކަމަށް ހާމަކޮށްފައެވެ. މެރެސްކާ ބުނި ގޮތުގައި އެއީ ޗިލްވެލްއަށް ގިނަ މެޗުތައް ކުޅުމުގެ ފުރުސަތު ނުލިބޭނެތީ ކަން އޮތް ގޮތް ކަމަށެވެ.
"އަހަރެން ދެކޭ ގޮތުގައި ޗިލްވެލްއަށް އެންމެ ރަނގަޅު ގޮތަކީ އޭނާއަށް ގިނަ މެޗުތަކުގައި ކުޅެވެނޭ ކްލަބަކަށް ދިއުން. އަހަރެން ވަރަށް ގާތްކޮށް ދެކޭ ކުޅުންތެރިޔެއް ޗިލްވެލްއަކީ. އެކަމަކު އޭނާއަށް މި ޓީމުގައި މި ވަގުތު ރަނގަޅު ޕޮޒިޝަނެއް ނެތް. އެހެންވެ އޭނާ އެހެން ކްލަބަކަށް ދާނެ ކަމަށް ލަފާ ކުރެވެނީ" ޗިލްވެލްގެ ކުރިމަގާ ބެހޭ ގޮތުން ވާހަކަދައްކަމުން އެންޒޯ ބުންޏެވެ.
ޗިލްވެލް, ޗެލްސީއާ ގުޅުނީ 2020 ވަނަ އަހަރުއެވެ. ޗެލްސީއިން ވަނީ އޭރު އޭނާ ކުޅެމުން އައި ކްލަބު ކަމުގައިވާ ލެއިސްޓާ ސިޓީއަށް 55 މިލިއަން ޑޮލަރާ ގާތް ކުރާ ފީއެއް, ޗިލްވެލް ގަތުމަށް ޓަަކައި ދައްކާފައެވެ.
ޗިލްވެލް ވަނީ, ޗެލްސީއާ ގުޅުނު ފަހުން އެ ކްލަބުގައި މޮޅު ކުޅުމެއް ދައްކާފައެވެ. ނަމަވެސް ފަހަކަށް އައިސް އޭނާއަށް ވަނީ ގިނަ އިންޖަރީތަކަކާ ކުރިމަތިލާން ޖެހި, އޭނާގެ ކުރީގެ ފޯމަށް އެޅޭ ގޮތް ނުވެފައެވެ.
