ޢައްޒާގެ އަޒް-ޒަވައިދާ ސަރަހައްދުގައި ހުރި، ގެދޮރު ގެއްލިފައިވާ މީހުން ބޯހިޔާވަހިކަމަށް ބޭނުންކުރަމުންދިޔަ ގުދަނަކަށް ޒަޔަނިސްޓު ލަޝްކަރުން ދިން ވައިގެ ހަމަލާއެއްގައި އަލް-އެޖްލާ ޢާއިލާގެ 15 މެންބަރުން ޝަހީދުވެއްޖެއެވެ.
މީގެ ތެރޭގައި 9 ކުޑަކުދިން ހިމެނެއެވެ. މިރޭ ދިން މި ހަމަލާގައި އިތުރު އާންމު ރައްޔިތަކުވެސް ޝަހީދުވެފައިވާތީ ޖުމްލަ 16 މީހެއްގެ ފުރާނަ ގެއްލިފައިވެއެވެ. ޝަހީދުވި މީހުންގެ ތެރޭގައި 3 އަންހެނުންނާއި އެ ޢާއިލާގެ އެންމެ އިސް ފަރާތްކަމުގައިވާ ސާމީ އަލް-އެޖްލާއާއި، އޭނާގެ އަނބިމީހާއާއި، މަންމައާއި، އަދި އޭނާގެ ހުރިހާ ދަރިންވެސް ހިމެނެއެވެ.
ނުސައިރާތު ރެފިއުޖީ ކޭމްޕުގެ ދެކުނުގައި ހުރި، ސާމީގެ މިލްކިއްޔާތުގައިވާ ގުދަނަށް ތިން މިސައިލުން ޙަމަލާދެވި، ބޮޑު އަލިފާންގަނޑެއްވެސް އެ ގުދަނުގައި ހިފާފައިވެއެވެ. މިހާރުވެސް ސަލާމަތްކުރުމުގެ މަސައްކަތް ކުރިއަށްދާއިރު، ހަށިގަނޑުތައް ދަނީ އަލް-އަޤްޞާ ހޮސްޕިޓަލުގެ މޯޗަރީއަށް ގެންދަމުންނެވެ.
މި ޙަމަލާ އައިސްފައިވަނީ އެމެރިކާ، ޤަޠަރު އަދި މިޞްރު ހިމެނޭގޮތަށް ހިނގަމުންދާ ހަނގުރާމަ ހުއްޓުވުމުގެ މަޝްވަރާތަކުގެ ތެރޭގައެވެ. މި މަސައްކަތްތައް ކުރެވެމުންދިޔަ ނަމަވެސް، ހަނގުރާމަ އިތުރަށް ގޯސްވަމުންދާކަމަށް ފެނެއެވެ. އަދި އިސްރާއީލުން ދަނީ ވައިގެ ހަމަލާތައް ތަކުރާރުކޮށް މީހުން ދިރިއުޅޭ ސަރަޙައްދުތަކަށް އަމާޒުކުރަމުންނެވެ. މީގެ ސަބަބުން އެތަކެއް އާއިލާތަކެއް މިހާރު ނެތިގޮސްފިއެވެ.
ޔަހޫދީ ބާރުތަކުން ޣައްޒާގެ މެދުތެރޭ ހިސާބުތަކުން މީހުން ހުސްކުރުމަށް އިތުރު އަމުރުކޮށްފައިވާއިރު، މީގެ ސަބަބުން އެތައް ހާސް މީހުން ވަނީ އެ ސަރަހައްދުން ނުކުންނަން މަޖުބޫރުވެފައެވެ.
ޣައްޒާގެ ޞިއްޙަތާބެހޭ ވުޒާރާއިން މަޢުލޫމާތުދޭގޮތުގައި އޮކްޓޯބަރު 7 އިން ފެށިގެން މިހާތަނަށް ޝަހީދުވެފައިވާ މީހުންގެ އަދަދު 40،074 އަށް އަރާފައިވާއިރު، 92,537 އަށްވުރެ ގިނަ މީހުން ޒަޚަމްވެފައިވެއެވެ.
