މޯލްޑިވްސް އިސްލާމިކް ބޭންކް (އެމްއައިބީ) ގެ ގެސްޓްހައުސް ސިމްޕޯސިއަމް އޮކްޓޯބަރު 10 ގައި ބާއްވަން ނިންމައިފިއެވެ.
މިއީ އެމްއައިބީއިން މި އިވެންޓް ބާއްވާ ތިން ވަނަ ފަހަރެވެ.
ކްރޮސްރޯޑްސް މޯލްޑިވްސްގައި ބޭއްވުމަށް ހަމަޖެހިފައިވާ މި އިވެންޓުގައި ގެސްޓްހައުސް ވެރިންނާއި، އިންޑަސްޓްރީގެ ސްޓޭކްހޯލްޑަރުންނާއި، އަދި މާހިރުން އެއްތަނަކަށް އެއްވެ، ގެސްޓްހައުސް ދާއިރާގެ މުހިންމު މައްސަލަތަކާއި ޓްރެންޑްތަކާ ބެހޭގޮތުން މަޝްވަރާކުރާނެއެވެ.
އެމްއައިބީއިން އިންތިޒާމުކޮށްގެން ބޭއްވި ނޫސްވެރިންގެ ބައްދަލުވުމުގައި، އެ ބޭންކުގެ ޑެޕިއުޓީ ސީއީއޯ އަހުމަދު ރިޒާ ވިދާޅުވީ، މި ފަދަ އިވެންޓެއް ބޭއްވުމުގެ މައިގަނޑު މަޤްޞަދަކީ ދިވެހިރާއްޖޭގެ ފަތުރުވެރިކަމުގެ ފުޅާކުރުމާއި، ގެސްޓްހައުސް ވިޔަފާރިއާ ގުޅުންހުރި އެންމެހައި ދާއިރާތަކުގެ ވިޔަފާރިވެރިން އެއްތަނަކަށް އެއްކޮށް، އެ ދާއިރާތަކަށް ދިމާވެފައިވާ ގޮންޖެހުންތަކަށް ޙައްލު ހޯދުން ކަމުގައެވެ.
މި ސިމްޕޯޒިއަމްގައި މި ދާއިރާގެ ފާހަގަކޮށްލެވޭ ފަރާތްތަކާއެކު ޕެނަލް މަޝްވަރާތަކެއްވެސް ބޭއްވޭނެއެވެ. އަދި އެ ފަރާތްތަކުން އެ ބޭފުޅުންގެ ތަޖުރިބާތަކާއި ޚިޔާލުތައް ހިއްސާކުރައްވާނެއެވެ.
ބައިވެރިންނަށް ނެޓްވޯކިންގ ފުރުސަތުތަކުގެ ފައިދާ ލިބޭނެއެވެ. މީގެ ތެރޭގައި ވާހަކަދައްކަވާ ފަރާތްތަކާއި އެހެން ބައިވެރިންނާ ސީދާ ބައްދަލުކުރުމުގެ ފުރުސަތު ހިމެނެއެވެ. ސެޝަންތަކުގައި ގެސްޓްހައުސް ވިޔަފާރީގެ އެކި ދާއިރާތަކަށް އަލިއަޅުވާލެވޭނެއެވެ. މިކަމުގެ މަޤްޞަދަކީ އެއްބާރުލުން އިތުރުކޮށް، މިހާރު ދިމާވެފައިވާ ގޮންޖެހުންތަކަށް ޙައްލު ހޯދުމެވެ.
ގެސްޓްހައުސް އެސޯސިއޭޝަންގެ ނައިބު ރައީސް އަހުމަދު ވަހީދު ހާމަކުރެއްވި ގޮތުގައި، ގެސްޓްހައުސްތަކާއި ހޮޓާތަކުގެ ވެރިފަރާތްތައް އެއްތަނަކަށް އެއްވެ، މާލީ އެހީތެރިކަން ހޯދުމުގެ ގޮތްތަކާއި، މާކެޓު ކުރާނެ ގޮތްތައް އޮޅުން ފިލުވާނެ ކަމަށެވެ.
