ބަންގްލަދޭޝްއިން ރައްކާތެރިކަން ހޯދައިގެން ތިބި މިޔަންމާގެ ރޮހިންޔާ ދަރިކޮޅުގެ މުސްލިމުންނަށް ރައްކާތެރިކަން ފޯރުކޮށްދެއްވާނެ ކަމަށް ބަންގްލަދޭޝް ސަރުކާރު ހިންގުމާ ވަގުތީ ގޮތުން ހަވާލުވެ ހުންނެވި ލީޑަރު ޑރ. މުހައްމަދު ޔޫނުސް މިއަދު ވިދާޅުވެއްޖެއެވެ.
ބަންގްލަދޭޝްގެ ވަގުތީ ލީޑަރުކަމާ ހަވާލުވެ ވަޑައިގެންނެވުމަށްފަހު ދެއްވި ފުރަތަމަ ހިތާބުގައިވެސް ރޮހިންޔާ މުސްލިމުންނަށް ރައްކާތެރިކަން ފޯރުކޮށްދެއްވާނެ ކަމަށް ވިދާޅުވުމުން ޑޮކްޓަރ ޔޫނުސްއަށް ބަންގްލަދޭޝް ރައްޔިތުން ދަނީ ވަރަށް ބޮޑަށް ތައުރީފް ކުރަމުންނެވެ.
ބަންގްލަދޭޝްއިން ރައްކާތެރިކަން ހޯދައިގެން ތިބި ރޮހިންޔާ ދަރިކޮޅުގެ ގިނަ ރައްޔިތުންނަކީ މިޔަންމާގެ އަސްކަރީ ސަރުކާރުން 2017 ވަނަ އަހަރު، ރޮހިންޔާ މުސްލިމުންގެ ނަސްލު ނައްތާލުމަށް ހިންގި ޤަތުލް އާންމުން ސަލާމަތްވުމަށް ބަންގްލަދޭޝްއަށް އެތެރެވި ރައްޔިތުންނެވެ.
"ބަންގްލަދޭޝްއިން ރައްކާތެރިކަން ހޯދައިގެން ތިބި މިލިޔަނެއްހައި ރޮހިންޔާ ދަރިކޮޅުގެ ރައްޔިތުންނަށް އަޅުގަނޑުމެން ރައްކާތެރިކަން ފޯރުކޮށްދޭނަން. އެކަމަށް ދޭންޖެހޭ ފުރިހަމަ އެއްބާރުލުން އަޅުގަނޑުމެން ފޯރުކޮށްދޭނަން" ދުނިޔޭގެ ނޯބަލް ސުލްހައިގެ އިނާމްވެސް ހާސިލް ކުރައްވައިގެން ހުންނެވި ޑރ.ޔޫނުސް ވިދާޅުވިއެވެ.
ބަންގްލަދޭޝްގެ ވަގުތީ ލީޑަރުކަމާ ޑރ.ޔޫނުސް ހަވާލުވެވަޑައިގަތީ މީގެ ދެހަފްތާއެއްހައި ދުވަސް ކުރިން، އޭރުގެ ބޮޑުވަޒީރު ޝެއިޚް ހަސީނާގެ ސަރުކާރުން ވަޒީފާ ދިނުމުގައި ގެންގުޅެމުންދިޔަ ބޭއިންސާފު ސިޔާސަތުތަކާ ދެކޮޅަށް ކިޔާވާ ކުދިން ނިކުމެ ކުރި ވަރުގަދަ މުޒާހަރާތައް ކޮންޓްރޯލް ނުވެ، ހަސީނާ މަގާމުން އިސްތިއުފާ ދެއްވައި ޤައުމު ދޫކުރައްވައި ވަޑައިގަތުމުންނެވެ.
