ޖަރުމަނު ގައުމީ ޓީމުގެ ކެޕްޓަންކަންވެސް ކޮށްފައިވާ ތަޖުރިބާކާރު މިޑްފީލްޑަރު އީކާ ގުންޑޮގަން ގައުމީ ޓީމަށް ކުޅުން ހުއްޓާލިކަން މިރޭ އިއުލާން ކޮށްފިއެވެ.
އުމުރުން 33 އަހަރުގެ ގުންޑޮގަން ގައުމީ ޓީމަށް ކުޅުން ހުއްޓާލިކަން އިއުލާން ކޮށްފައިވާއިރު، ޖަރުމަނުގައި މިދިޔަ ޖުލައި މަހު ނިމުނު ޔޫރޯ ފުޓްބޯޅަ މުބާރާތުގައި ޖަރުމަނު ގައުމީ ޓީމުގެ ކެޕްޓަން ބޭންޑް އަޅައިގެން ކުޅުނީވެސް ގުންޑޮގަންއެވެ. އެ މުބާރާތުގައި ހަންގޭރީ ކޮޅަށް އޭނާ ލަނޑެއްވެސް ޖެހިއެވެ.
ގައުމީ ޓީމަށް ކުޅެދިން 82 މެޗުގައި 19 ލަނޑު ކާމިޔާބު ކޮށްދީފައިވާ ގުންޑޮގަން ބުނީ ގައުމީ ޖާޒީގައި، ގައުމީ ޓީމު ލީޑް ކުރަން ލިބުނު ފުރުސަތަކީ ފަޚްރެއްކަމަށް އަބަދުވެސް ދެކޭނެ ކަމަށެވެ. "ގައުމީ ޓީމު ތަމްސީލް ކުރަން ލިބުމަކީ ފަޚްރެއް. ވަކިން ހާއްސަކޮށް އެންމެފަހުގެ ޔޫރޯގައި ގައުމީ ޓީމުގެ ކެޕްޓަން ބޭންޑް އަޅައިގެން ގައުމު ތަމްސީލް ކުރަން ލިބުމަކީ ވަކިން ބޮޑު ފަޚްރެއް. އެކަމަކު އަހަރެންގެ ހިތް މިހާރު އެބަބުނޭ އެންމެ މަތީ ފަންތީގައި ގައުމު ތަމްސީލް ކުރަން އަހަރެންގެ ހަށިގަނޑު ވަރުބަލިވެއްޖެ ކަމަށް. ސިކުނޑި ވަރުބަލިވެއްޖެ ކަމަށް. އުއްމީދަކީ 2026 ގެ ވަރލްޑް ކަޕް ކާމިޔާބު ކުރާނެ ގައުމުތަކުގެ އެންމެ ކުރީ ލިސްޓުގައި ޖަރުމަނު އޮތުން" ގުންޑޮގަން ބުންޏެވެ.
ގުންޑޮގަން ގައުމީ ޓީމަށް ކުޅުން ހުއްޓާލާފައި މިވަނީ، ބާސެލޯނާ ދޫކޮށް އެނބުރި މެންޗެސްޓަރ ސިޓީއަށް ބަދަލުވާން އުޅޭ ކަމުގެ އަޑުތައްވެސް ވަރަށް ގަދަވެފައިވާ ދުވަސްކޮޅެއްގައެވެ. މަޝްހޫރު ކުޅިވަރު ނޫސްވެރިޔާ ފެބްރީޒިއޯ ރޮމާނޯގެ ރިޕޯޓްތަކަށް ބަލާއިރު މިހާރު ކުރިއަށްދާ ޓްރާންސްފާ މާކެޓް ނިމުމުގެ ކުރިން ގުންޑޮގަން ބާސެލޯނާ ދޫކޮށްލާނެއެވެ.
