ޣައްޒާގެ މައްސަލައިގައި ހަގީގީ ކުރިއެރުމެއް ނުލިބެނީސް ޒަޔަނިސްޓް އިޒްރޭލާއެކު ސްކޮޓްލޭންޑް ސަރުކާރުން އެއްވެސް ބާވަތެއްގެ މަޝްވަރާއެއް ނުކުރާނެ ކަމަށް އެކްސްޓާނަލް އެފެއާޒް ސެކްރެޓަރީ އެންގްސް ރޮބަޓްސަން ވިދާޅުވެއްޖެ އެވެ.
"ސުލްހައާ ދިމާލަށް ހަގީގީ ކުރިއެރުންތަކެއް ލިބި، އިންސާނީ އެހީތެރިކަން ހުރަހެއް ނެތި ލިބި، ނަސްލު ނައްތާލުމާއި ހަނގުރާމައިގެ ޖަރީމާތައް ތަހުގީގުކުރުމުގައި އިސްރާއީލުން ބައިނަލްއަގްވާމީ ވާޖިބުތަކަށް ފުރިހަމައަށް އެއްބާރުލުން ނުދޭހާ ހިނދަކު އަޅުގަނޑުމެންގެ މި ނިންމުން ބަދަލެއް ނުވާނެ. އެއްވެސް ބާވަތެއްގެ މަޝްވަރާއަށް އިޒްރޭލުން ދޭ ދައުވަތެއް އަޅުގަނޑުމެން ގަބޫލެއް ނުކުރާނަން" ރޮބަޓްސަން ވިދާޅުވި އެވެ.
ރޮބަޓްސަން މިހެން ވިދާޅުވީ މީގެ ދެ ހަފްތާއެއްހާ ދުވަސް ކުރިން އިނގިރޭސިވިލާތުގައި ހުންނަ އިސްރާއީލުގެ ޑެޕިއުޓީ އެމްބެސެޑަރު ޑެނިއެލާ ގްރޫޑްސްކީއާ ބައްދަލުކުރެއްވުމުން ސްކޮޓިޝް ނޭޝަނަލް ޕާޓީ (އެސްއެންޕީ) ގެ ތެރޭގައި ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ.
ރޮބަޓްސަން ވިދާޅުވީ އިޒްރޭލުން އިނގިރޭސިވިލާތަށް ކަނޑައަޅާފައި ހުރި ޑެޕިއުޓީ މިނިސްޓަރާ ބައްދަލު ކުރެއްވީ ސްކޮޓްލޭންޑުގެ ނިންމުންތައް ރަސްމީ ސިފައެއްގައި އިޒްރޭލަށް އެންގުމަށްޓަކައި ކަމަށެވެ.
ސްކޮޓްލޭންޑަކީ އިޒްރޭލުން ޣައްޒާގައި ހިންގަމުން އަންނަ ނަސްލު ނައްތާލުމުގެ ޖަރީމާ ވަރަށް ފާޅުކަން ބޮޑު ގޮތެއްގައި ކުއްވެރި ކުރަމުން އަންނަ ގައުމެކެވެ. އަދި ފަަލަސްތީނަށް މިނިވަން ދައުލަތެއް ހޯދައި ދިނުމަށް އެންމެ ހަރުކޮށް އަޑު އުފުލާ އެއްގައުމަކީވެސް ސްކޮޓްލޭންޑުކަން ފާހަގަ ކޮށްލެވެއެވެ.
