އިހަވަންދިއްޕޮޅުގައި މެރިޓައިމް އަދި އޯޕީއެލްގެ ޚިދުމަތް ފޯރުކޮށްދިނުމުގެ ގޮތުން މޯލްޑިވްސް ޕޯޓްސް ލިމިޓަޑް (އެމްޕީއެލް) އާއި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯއާ) ދެމެދު ފަހުމުނާމާއެއްގައި މިއަދު ސޮއިކޮށްފިއެވެ.
އެމްޕީއެލްގެ ހެޑް އޮފީހުގައި މިއަދު އޮތް ރަސްމިއްޔާތުގައި އެމްޕީއެލްގެ ފަރާތުން މި ފަހުމުނާމާގައި ސޮއިކުރީ އެމްޕީއެލްގެ ސީއީއޯ މުޙައްމަދު ވަޖީހް އިބްރާހިމެވެ. އަދި އެސްޓީއޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ ޝިމާދު އިބްރާހިމެވެ.
އުތުރު ސަރަޙައްދުގައި އިންޓަރނޭޝަނަލް ބަންކަރިންގ ޚިދުމަތާއެކު، މެރިޓައިމް ދާއިރާގެ އިތުރު ޚިދުމަތްތައްވެސް ތަޢާރަފުކުރުމަށް ނިންމާފައިވާކަމަށް އެމްޕީއެލްއިން ވިދާޅުވިއެވެ. މި ގޮތުން، އެސްޓީއޯ އިން އޮފްޝޯ ބަންކަރިންގ ޚިދުމަތް ފޯރުކޮށްދޭނެއެވެ. އަދއެމްޕީއެލް އިން ޕައިލަޓޭޖާއި މެރިޓައިމް ދާއިރާގެ އެހެނިހެން ޚިދުމަތްތައް ފޯރުކޮށްދޭނެކަމަށް އެމްޕީއެލްއިން ވިދާޅުވިއެވެ.
މި ފަހުމުނާމާގެ ދަށުން ބަންކަރިންގ ޚިދުމަތް ފޯރުކޮށްދިނުމުގައި ދެ ކުންފުނިން ގުޅިގެން، ވިހާވެސް ފަސޭހަ ޚިދުމަތެއް ފޯރުކޮށްދޭން މަސައްކަތްކުރުމަށް އެއްބަސްވެފައިވާކަމަށާއި މި ޚިދުމަތް މާކެޓް ކުރުމުގައި ދެ ކުންފުނިން ގުޅިގެން މަސައްކަތްކުރާނެކަމަށް އެމްޕީއެލްއިން ވިދާޅުވިއެވެ.
އެމްޕީއެލްގެ ސީއީއޯ ވަޖީހް ވިދާޅުވީ އުތުރުގެ ސަރަހައްދަކީ ބައިނަލްއަޤްވާމީ މެރިޓައިމްގައި މުހިންމު ރޫޓަކަށްވާއިރު، އުތުރުގައި ބަންކަރިންގ އާއި މެރިޓައިމްގެ ޚިދުމަތްތައް ފޯރުކޮށްދޭން ފެށުމަކީ ދިވެހިރާއްޖެއަށް ބޮޑުފައިދާއެއް ކުރާނެ ކަމެއް ކަމަށެވެ.
ސީއީއޯ ވަޖީހު އިތުރަށް ވިދާޅުވީ، އެއްވެސް ޚާއްޞަ މާކެޓިންގ މަސައްކަތެއް ނުކުރި ނަމަވެސް، ހއ. އުލިގަމު ކައުންސިލްގެ މިހާރުގެ ރެކޯޑުތަކުން ދައްކާގޮތުގައި، މަހެއްގެ މައްޗަށް 6 ނުވަތަ 8 އާގު ބޯޓު ފެނުގެ ޚިދުމަތް ހޯދުމަށް އެ ސަރަހައްދަށް ކޯލްކުރާކަމަށެވެ.
އެހެންކަމުން، އެ ސަރަހައްދުން ތެޔޮ އަދި ފެނުގެ ޚިދުމަތް ފޯރުކޮށްދެވޭ ނަމަ، ފައިދާ ބޮޑު ވިޔަފާރިއެއް ޤާއިމުކުރެވިގެންދާނެ ކަމަށް ވަޖީހް ވިދާޅުވިއެވެ.
