ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު ސައުދީ ޢަރަބިއްޔާއަށް ކުރެއްވި ރަސްމީ ދަތުރުފުޅު ނިންމަވާލައިފިއެވެ. މި ދަތުރުފުޅުގެ މަޤްޞަދަކީ ދިވެހިރާއްޖެއާއި ސަޢޫދީ އަރަބިއްޔާއާ ދެމެދު އޮތް ގުޅުން އިތުރަށް ބަދަހިކުރުމެވެ.

މި ދަތުރުފުޅުގައި ވަޒީރު ޒަމީރު ސަޢޫދީ އަރަބިއްޔާގެ ޚާރިޖީ ވަޒީރު، ފައިޞަލް ބިން ފަރުޙާން އަލް-ސަޢޫދާ ބައްދަލުކުރެއްވިއެވެ. މި ބައްދަލުވުމުގައި ވަޒީރު ޒަމީރު ވަނީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ސަޢޫދީ އަރަބިއްޔާގެ ރަސްގެފާނުގެ ވަލީޢަހުދު އަދި ބޮޑުވަޒީރު އަލްއަމީރު މުޙައްމަދު ބިން ސަލްމާން ބިން ޢަބްދުލްޢަޒީޒް އަލްސަޢޫދަށް ފޮނުއްވެވި ސިޓީފުޅެއް ސަޢުދީގެ ޚާރިޖީ ވަޒީރަށް އަރުވާފައެވެ.

ޕްރިންސް ފައިސަލްއާއެކު ބޭއްވުނު ބައްދަލުވުމުގައި، ވަޒީރު ޒަމީރު ދެ ޤައުމުގެ ދެމެދުގައި އޮތް ދިގު މުއްދަތުގެ އުޚުއްވަތްތެރި ގުޅުމާއި ރަޙްމަތްތެރިކަމުގެ ގުޅުމާ ބެހޭގޮތުން މަޝްވަރާކުރެއްވިއެވެ. އަދި ދެ ޤައުމަށް މަންފާކުރާނެ ދާއިރާތަކުގައި ކުރިމަގުގައި އެއްބާރުލުން ދެވިދާނެ ދާއިރާތަކާ ބެހޭގޮތުންވެސް މަޝްވަރާކުރެއްވިއެވެ.

މީގެ އިތުރުން. 4 ދުވަހުގެ މި ރަސްމީ ދަތުރުފުޅުގައި ވަޒީރު ޒަމީރު ސަޢޫދީ ޢަރަބިއްޔާގެ ސަރުކާރުގެ އެހެން އިސް ބޭފުޅުންނާއި ސަޢޫދީ ފަންޑު ފޯ ޑިވެލޮޕްމަންޓްގެ އިސްވެރިންނާވެސް ބައްދަލުކުރެއްވިއެވެ.

ޚާރިޖީ ވަޒީރު މޫސާ ޒަމީރު ވަނީ ސައުދީގައި ހުންނަ ދިވެހިރާއްޖޭގެ އެމްބަސީއަށް ޒިޔާރަތްކުރައްވައި އެމްބަސީގެ މުވައްޒަފުންނާ ބައްދަލުކުރައްވާފައެވެ. އަދި ރިޔާދުގައި ދިރިއުޅޭ ދިވެހިންނާ ބައްދަލުކުރައްވައި އެ ބޭފުޅުންގެ ޙާލު އަޙްވާލުވެސް ޚާރިޒީ ވަޒީރު ބެއްލެވިއެވެ.

ވަޒީރު ޒަމީރުގެ މި ދަތުރުފުޅުގައި އެމަނިކުފާނާއެކު މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރު، އެމްބެސެޑަރ އެޓް ލާޖް އަޙްމަދު ނަޞީރު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރު އިބްރާހީމް ޝަރީފް މުޙައްމަދު، ޖޮއިންޓް ސެކްރެޓަރީ ބަދޫރާ ސަޢީދު، އަދި ޑިރެކްޓަރ ޖެނެރަލް ޢާއިޝަތު ފަރީނާ ބައިވެރިވެވަޑައިގެންނެވިއެވެ.

އިތުރު ލިޔުންތައް ފޮރިން މިނިސްޓްރީ ސައުދީ އަރަބިއާ