ޒަޔަނިސްޓް އިޒްރޭލުން އިއްޔެ ލުބްނާނަށް ވައިގެ މަގުން ހަމަލާދީ 8 މީހުން ޝަހީދު ކޮށްލާފައިވާ ކަމަށް ލުބްނާނުގެ ކަމާ ބެހޭ އިދާރާތަކުން ބުނެފިއެވެ.
އެމެރިކާއިން ދީފައިވާ އެންމެފަހުގެ ބޮން އަޅާ ބޯޓުތަކުން ޒަޔަނިސްޓް އިޒްރޭލުން އިއްޔެ ވަނީ ލުބްނާނުގެ ސަރަހައްދަށް އެކި ފަހަރުގެ މަތިންވަދެ ހަމަލާދީފައެވެ. ލުބްނާނުގެ ކަމާ ބެހޭ ފަރާތްތަކާއި ހަވާލާދީ "ދި ގާޑިއަން" އިން ބުނީ އިޒްރޭލުގެ ހަމަލާތަކުގައި ޝަހީދުވި މީހުންގެ ތެރޭގައި ފަލަސްތީނުގެ މިނިވަންކަމަށްޓަކައި ޖިހާދުުކުރާ ހަމާސް ޖަމާއަތުގެ އިސް އޮފިޝަލަކާއި ލުބްނާނުގެ ޓީވީ ސްޓޭޝަނެއްގައި މަސައްކަތް ކުރާ ދެ ނޫސްވެރިންނާއި ކުޑަކުއްޖަކުވެސް ހިމެނޭ ކަމަށެވެ.
ހައްދުފަހަނައެޅި އިޒްރޭލުގެ އަސްކަރިއްޔާއިން މިހަމަލާތަކާ ގުޅޭ ގޮތުން ބުނީ ހަމަލާދިނީ ލުބްނާނުގައި ހަރަކާތްތެރިވާ ހިޒްބުﷲ ޖަމާއަތުގެ މަގާމުތަކަށް ކަމަށެވެ. އަނެއްކޮޅުން ހިޒްބުﷲ ޖަމާއަތުން، ލުބްނާނާއި ކައިރީގައިވާ އިޒްލޭލުގެ އަވަށްތަކަށް ދެމުން އަންނަ ރޮކެޓް ހަމަލާތައް ވަނީ ވަރަށް ބޮޑަށް އިތުރުވެފައެވެ. އިއްޔެ އެކަނިވެސް ހިޒްބުﷲ ޖަމާއަތުން އިޒްރޭލަށް އަމާޒުކޮށް 20 ރޮކެޓް ފޮނުވާލިއެވެ. ހިޒްބުﷲގެ ހަމަލާތަކަ ހުރެ، ލުބްނާނާއި ކައިރިގައިވާ އިޒްރޭލުގެ އަވަށްތަކުން ގިނަބަޔަކަށް ވަނީ އެސަރަހައްދު ދޫކޮށް ދިޔުމަށް މަޖުބޫރުވެފައެވެ.
