ޖަރުމަނުވިލާތުގެ ސޯލިންގެން ސިޓީގައި ބޭއްވި ފެސްޓިވަލެއްގައި ހިނގި ވަޅީގެހަމަލާއެއްގައި 3 މީހުން މަރުވެ، އިތުރު 4 މީހުން ބޮޑެތި އަނިޔާތަކަކާއެކު ޒަޚަމްވެއްޖެއެވެ.
މި ހާދިސާ ހިނގީ ހުކުރު ދުވަހުގެ ރޭ ޖަރުމަނު ގަޑިން ގާތްގަނޑަކަށް 10 ޖަހާއިރު، އެ ސިޓީގެ 650 އަހަރު ފުރުން ފާހަގަކުރުމަށް ބޭއްވި ފެސްޓިވަލެއްގައެވެ. އަދި މިހާތަނަށް ކާކުމެއް ޔަގީންނުކުރެވޭ މީހަކު، ލައިވް މިއުޒިކް ކުޅެމުންދިޔަ ފްރޮންހޯފް މާކެޓް ސްކުއެއަރގައި ތިބި މީހުންނަށް ވަޅިން ހަމަލާދީފައިވާކަމަށް ރިޕޯޓުތަކުންބުނެއެވެ.
ތަޙްޤީޤުތައް ކުރިއަށްދާއިރު، ކަމާބެހޭ ފަރާތްތަކުން ވަނީ ސިޓީގެ މަރުކަޒީ ސަރަހައްދު ބަންދުކޮށްފައެވެ. ސޯލިންގެންގެ މޭޔަރު ޓިމް-އޮލިވަރ ކުރުޒްބާޗް ވަނީ މި ހާދިސާއާ ގުޅިގެން ފުން ހިތާމަ ފާޅުކޮށްފައެވެ.
ހަފްތާ ނިމެންދެން ކުރިއަށްދާގޮތަށް ރޭވިފައިވާ "ފެސްޓިވަލް އޮފް ޑައިވަރސިޓީ" މި ހާދިސާގެ ސަބަބުން ވަނީ ނިވާވެފައެވެ. ޖަރުމަނުގައި ވަޅީގެ ހަމަލާތައް ވަރަށް މަދުކަމުން، މި ހަމަލާއަކީ އެ ޤައުމަށް ވަރަށް ބޮޑު ސިހުމަކަށް ވެގެންދިޔަ ހާދިސާއެކެވެ. ފުލުހުން ޝައްކުކުރެވޭ މީހާ ހޯދުމަށް މަސައްކަތްކުރަމުންދާއިރު، އެ ސިޓީ ވަނީ އަދިވެސް ހައި އެލާޓުގެ ހާލަތުގައެވެ.
