އިނގިރޭސި ޕްރިމިއަރ ލީގުގައި އިޕްސްވިޗް ޓައުން ކޮޅަށް މެންޗެސްޓަރ ސިޓީގެ ފޯވާޑް އާލިންގ ހާލަންޑް މިރޭ ހެޓްރިކް ހެދުމުން ކޯޗް ޕެޕް ގާޑިއޯލާ ހިފެހެއްޓުމެއް ނެތް ތައުރީފް ހާލަންޑަށް އޮއްސާލައިފިއެވެ.
އިޕްސްވިޗް ކޮޅަށް ހާލަންޑް ހެދި ހެޓްރިކަކީ މެންޗެސްޓަރ ސިޓީގެ ޖާޒީގައި އޭނާ ހެދި 10 ވަނަ ހެޓްރިކެވެ. މިއީ ސިޓީގައި އޭނާ ހޭދަކުރާ ތިންވަނަ ސީޒަނެވެ.
ސިޓީ ސިއްސުވާލުމަށްފަހު އިޕްސްވިޗުން މެޗުގެ 7 ވަނަ މިނެޓުގައި ލީޑް ނަގާފައި ވަނިކޮށް ހާލަންޑް ލަނޑުތައް ކާމިޔާބުކޮށް ހެޓްރިކް ހެދީ މެޗުގެ 12، 16 އަދި 88 ވަނަ މިނެޓުގައި ލަނޑު ޖަހައިގެންނެވެ. މީގެތެރެއިން ފުރަތަމަ ލަނޑު ހާލަންޑު ޖެހީ ލިބުނު ޕެނަލްޓީއަކުންނެވެ. ސިޓީގެ އަނެއްލަނޑު ކާމިޔާބު ކޮށްދިނީ ބެލްޖިއަމްގެ ތަޖުރިބާކާރު މިޑްފީލްޑަރު ކެވިން ޑިބްރޭނާއެވެ.
މެޗަށްފަހު ވާހަކަ ދައްކަމުން ސިޓީގެ ކޯޗް ގާޑިއޯލާ ބުނީ ލަނޑު ޖެހުމުގައި ހާލަންޑުގެ ނަންބަރު ފެންނަނީ ހައިރާންވާހައި މަތިކޮށް ކަމަށެވެ. "އޭނާގެ ލަނޑު ޖެހުމުގެ ނަންބަރުން ބަލާ ކަމުގައިވާނަމަ، ލިއޮނަލް މެސީ އާއި ކްރިސްޓިއާނޯ ރޮނާލްޑޯއާ އެލެވެލްއެއްގައި ހާލަންޑް ގުނާލެވޭނެ" ގާޑިއޯލާ ބުންޏެވެ.
އެކަމަކު އެންމެ މޮޅު ސެންޓަރ ފޯވާޑަކީ ހާލަންޑުތޯ ނޫސްވެރިޔަކު އެހުމުން ގާޑިއޯލާ ދިން ޖަވާބު މުޅިން ތަފާތެވެ. "އެންމެ މޮޅު ސެންޓަރ ފޯވާޑަކީ މެސީ" ބާސެލޯނާގައި މެސީ ގޮވައިގެން މެދުއުޑުގައި ފިޔަޖެހި ގާޑިއޯލާ ބުންޏެވެ.
