މީގެ ދެހަފްތާއެއްހައި ދުވަސް ކުރިން އެމެރިކާ އާއި ހުޅަނގުގެ އެހީގައި ޔޫކްރައިން ފައުޖުތަކުން ހިފި ރަޝިޔާގެ ކަރސްކް ރީޖަންގެ އެއް އަވަށް ރަޝިޔާގެ އަސްކަރިއްޔާގެ ބާރުގެ ދަށަށް ގެނެސް މިނިވަން ކޮށްފިއެވެ.
ކަރސްކް ރީޖަންގެ އެއް އަަވަހަށް އަލުން ރަޝިޔާގެ ފުރިހަމަ ކޮންޓްރޯލުގެ ދަށަށް ގެނައީ ރަޝިޔާގެ ކަޅު ކަނޑުގެ ފްލީޓްގެ 810 ވަނަ ޑިޓެޗްޑް ގާޑްސް މެރިން އިންފެންޓްރީ ބްރިގޭޑުންނެވެ. "ކޮންމެ ދުވަހަކު މިދަނީ ދުޝްމިނުންގެ ބާރުތައް އެންމެ މަތިން ފެށިގެން ލުހެލައި ނައްތާލަމުން. 810 ބްރިގޭޑް ޔުނިޓުން ކަރސްކް ރީޖަންގެ އެއް އަވަށް މިވަނީ މިނިވަން ކޮށްފައި" ރަޝިޔާގެ ސިފައިންގެ މައި މިލިޓަރީ ޕޮލިޓިކަލް ޑިޕާޓްމަންޓުގެ ޑެޕިއުޓީ ހެޑް އަދި އަޚްމަތު ސްޕެޝަލް ފޯސްގެ ހެޑް މޭޖާ ޖެނެރަލް އަޕްތީ އަލައުޑިނޯވް "ޓާސް" އަށް ވިދާޅުވި އެވެ.
ރަޝިޔާއިން ތުހުމަތު ކުރާ ގޮތުގައި ކަރސްކް ރީޖަންގެ ތިރީހަކަށް ކިލޯ މީޓަރުގެ ސަރަހައްދެއް ޔޫކްރައިނުން ހިފީ، ސީދާ ނެޓޯގެ ކޮމާންޑަރު އިސްވެ ހުންނަވައިގެން ކުރިއަށް ގެންދިޔަ އޮޕަރޭޝަނަކުންނެވެ.
މިއީ ދެވަނަ ބޮޑު ހަނގުރާމައިގެ ފަހުން ރަޝިޔާގެ ބިމުގެ ސަރަހައްދެއް ބޭރުގެ ބާރަކުން ހިފި ފުރަތަމަ ފަހަރުކަން ފާހަގަ ކޮށްލެވެއެވެ. ކަރސްކް ރީޖަންގެ އަވަށްތައް ޔޫކްރައިން ފައުޖުތަކުން ހިފަމުންދިޔައިރު ހުޅަނގުގެ ހަންފަތުރާ މީޑިޔާތައް ކަމުގައިވާ ބީބީސީ އާއި ސީއެންއެންއިން ވަނީ ވަރަށް ކައިރިން މިޚަބަރުތައް ކަވަރކޮށްފައެވެ. ރަޝިޔާއިން މިހާރު ދަނީ ޔޫކްރައިން ފައުޖުތަކާއެކު މިސަރަހައްދަށް ވަދެގަތް މީޑިޔާތަކާ ދެކޮޅަށް ފިޔަވަޅު އެޅުމަށް މަސައްކަތް ކުރަމުންނެވެ.
