އިސްރާއީލުގެ ސިފައިން ޣައްޒާގެ މިސްކިތެއްގައި ޤުރުއާން އަންދާލި މައްސަލަ އަރަބި އަދި މުސްލިމް ޤައުމުތަކުން ފުޅާ ދާއިރާއެއްގައި ކުށްވެރިކުރުމަށް، ހަމާސް އިން ގޮވާލައިފިއެވެ.
ހަމާސްއިން ހޮނިހިރު ދުވަހު ނެރުނު ބަޔާނެއްގައި މި ހާދިސާ ކުށްވެރިކުރައްވައި، މިކަމުން ޒަޔަނިސްޓު ބާރުތަކުގެ ހައްދުފަހަނަޅާފައިވާ ސިފަ އަދި އިސްލާމީ މުޤައްދަސާތްތަކާ މެދު އެމީހުންގެ ރެސިސްޓް ވިސްނުން ހާމަވާކަމަށް ވިދާޅުވެފައިވެއެވެ.
އަލްޖަޒީރާ އަރަބިކް އިން ދައްކާފައިވާ ވީޑިއޯއެއްގައި އިސްރާއީލުގެ ސިފައިން ޣައްޒާގެ އުތުރުގައިވާ ބަނީ ސާލެހް މިސްކިތުގައި ޤުރުއާނުގެ ސަފުހާތައް ވަކިކޮށް އަންދާލާ މަންޒަރު ދައްކާފައިވެއެވެ. އަދި މި ޗެނަލުން ޚާންޔޫނިސްގެ ތާރީޚީ މަސްޖިދުލް ކަބީރު ބޮންއެޅި މަންޒަރުވެސް ޑްރޯން ވީޑިއޯއެއްގެ ޒަރީއާއިން ދައްކާފައިވެއެވެ.
ޣައްޒާ ސަރުކާރުގެ މީޑިއާ އޮފީހުން ވިދާޅުވާ ގޮތުގައި، ވޭތުވެދިޔަ 10 މަސްދުވަހުގެ ތެރޭގައި އިސްރާއީލުން ޣައްޒާގައި 610 އަށްވުރެ ގިނަ މިސްކިތާއި ނަސޯރާއިންގެ 3 ޗާޗު ވަނީ ބޮންއަޅާ، ހަލާކުކޮށްލާފައެވެ. މިކަމާ ގުޅިގެން، ޙަމާސްއިން ގޮވާލާފައިވަނީ ފަލަސްޠީނުގައި ހުރި މުސްލިމުންގެ މިސްކިތްތަކާއި ނަސޯރާއިންގެ ޗާޗުތައް ރައްކާތެރިކުރުމަށް ދުނިޔޭގެ ޤައުމުތަކުން މަސައްކަތްކުރުމަށެވެ.
ޣައްޒާއާ ދެކޮޅަށް ކުރިއަށްދާ ނަސްލު ނައްތާލުމުގެ ހަނގުރާމަވެސް ހަމާސްއިން ކުށްވެރިކޮށްފައިވެއެވެ. އެމެރިކަން-އިސްލާމިކް ރިލޭޝަންސް ކައުންސިލް (ކެއަރ) އިން ވެސް ވަނީ އެމެރިކާގެ ރައީސް ޖޯ ބައިޑަންއަށް މި ފަދަ މުޤައްދަސް ތަންތަން ހަލާކުކުރުން ކުށްވެރިކުރުމަށާއި އިސްރާއީލަށް ހަތިޔާރު ފޮނުވުން ހުއްޓާލުމަށް ގޮވާލާފައެވެ.
