ކެރިޔަރުގައި ދެން އެހެން ކްލަބަކަށް ނުކުޅޭނެ ކަމަށާއި ކުޅުން ހުއްޓާލާނީ އަލް ނަސްރުގައި ކަމަށް ޕޯޗުގަލްގެ ސުޕަރ ސްޓަރ ކްރިސްޓިއާނޯ ރޮނާލްޑޯ ބުނެފިއެވެ.
ރޮނާލްޑޯ މިހެން ބުނީ ޕޯޗުގަލްގެ ޓީވީ ޗެނަލަކަށް ދިން ބަސްދީގަތުމެއްގައެވެ.
"އަހަންނަށް ޔަގީންކޮށް ބުނެދޭކަށް ނޭނގޭ ކުރިއަށް އޮތް ދެތިން އަހަރު ތެރޭ އަހަރެން ކުޅުން ހުއްޓާލާނެތޯ ނުވަތަ ނޫންތޯ. އެކަމަކު ޔަގީންކަން ދެން އަހަރެން ކުޅުން ހުއްޓާލާނީ އަލް ނަސްރުގައިކަން" ރޮނާލްޑޯ ބުންޏެވެ.
ރޮނާލްޑޯ ބުނީ އޭނާ ސައުދީ ލީގުގައި ކުޅެމުންދަނީ ވަރަށް ހިތްހަމަޖެހިގެން ކަމަށާއި ސައުދީގެ ސަގާފަތާއި އާދަކާދަތަކަށް އޭނާ ގަޔާވާކަމަށެވެ.
މީގެ އިތުރުން ރޮނާލްޑޯ ބުނީ ކޯޗިން ތެރެއަށް ވަނުމަށް އެއްވެސް ޝައުގުވެރިކަމެއް ނެތް ކަމަށެވެ. "އަހަންނަށް ހިޔާލަށްވެސް ނުގެނެވޭ ޓީމަކަށް އިރުޝާދުދޭން ބެންޗުގައި އިންނާނެ މަންޒަރެއް" ރޮނާލްޑޯ ބުންޏެވެ.
ރޮނާލްޑޯ، ޔުވެންޓަސް ދޫކޮށް އަލް ނަސްރާ ގުޅުނީ 2023 ވަނަ އަހަރުގެ ޖެނުއަރީ ޓްރާންސްފާގައެވެ. ޔޫރަޕުގައި ވަރަށް ކާމިޔާބު ކެރިޔަރެއް ހޭދަކުރި ރޮނާލްޑޯއަކީ ޔުއެފާ ޗެމްޕިއަންސް ލީގުގެ ތާރިހުގައި އެންމެ ގިނަ ލަނޑު ޖެހި ކުޅުންތެރިޔާއެވެ. އަދި ޗެމްޕިއަންސް ލީގް ތަށި އޭނާ ވަނީ 5 ފަހަރު ކާމިޔާބު ކޮށްފައެވެ.
