ސްޕެނިޝް ލަލީގާގައި ރަޔޯ ވަޔަކާނޯ އަތުން ފަހަތުން އަރައި 2-1 އިން މޮޅުވެ ތާވަލުގެ އެއްވަނަ މަގާމަށް މަޝްހޫރު ބާސެލޯނާ މިރޭ ޖެހިލައިފިއެވެ.
މިމެޗުގައި ބާސެލޯނާގެ ތަރިޔަކަށް ވެގެންދިޔައީ މިފަހަރުގެ ޓްރާންސްފާ މާކެޓުގައި އެކްލަބާ ގުޅުނު ހުނަރުވެރި ސްޕެއިން ގައުމީ ޓީމުގެ މިޑްްފީލްޑަރު ޑެނީ އޮލްމޯއެވެ. މިރޭގެ މެޗަކީ އޮލްމޯ ބާސެލޯނާގެ ސީނިއަރ ޓީމަށް ކުޅެދިން ފުރަތަމަ މެޗެވެ. މިމެޗުގައި ފުރަތަމަ ލަނޑު، ފުރަތަމަ ހާފުގެ 9 ވަނަ މިނެޓުގައި ކާމިޔާބުކޮށް ލީޑް ނެގީ ވަޔަކާނޯއިންނެވެ. ފުރަތަމަ ހާފް ނިމުނީ މިނަތީޖާގައި އޮވެއެވެ.
ދެވަނަ ހާފް ފަށައިގެން ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކުރަމުންްދިޔަ ބާސެލޯނާއަށް ލަނޑެއް ޖެހުނީ 60 ވަނަ މިނެޓުގައެވެ. މިލަނޑު ކާމިޔާބު ކޮށްދިނީ ޒުވާން މިޑްފީލްޑަރު ޕެޑްރީއެވެ. މެޗުން ބާސެލޯނާ މޮޅުވި ލަނޑު، މެޗް ނިމެން 8 މިނެޓަށްވެފައި ވަނިކޮށް އޮލްމޯ ކާމިޔާބު ކުރީ ލަމީން ޔަމާލް ތަނަވަސްކޮށްދިން ފުރުސަތަކުންނެވެ. މިއީ ބާސެލޯނާގެ ޔޫތު ޓީމުން އުފެއްދި އޮލްމޯ، ސިނިއަރ ލެވެލްގައި ބާސެލޯނާއަށް ކާމިޔާބު ކޮށްދިން ފުރަތަމަ ލަނޑެވެ.
https://wsc.googlesearch.laliga.com/games/66ce2a5c5b3d31a91ed18e1a.html
ވަޔަކާނޯގެ ދަނޑުގައި ކުޅުނު މިމެޗުގައި ބާސެލޯނާއިން ވަނީ މޮޅަށް ކުޅެ ގިނަ ހަމަލާތަކެއް އުފައްދާފައެވެ. މިގޮތުން 22 ހަމަލާ ވަޔަކާނޯގެ ގޯލަށް ބާސެލޯނާއިން ފޮނުވާލިއެވެ. ވަޔަކާނޯއިން 8 ހަމަލާ އުފެއްދިއެވެ.
މިމޮޅާއެކު ތާވަލުގެ އެއްވަނައިގައި 9 ޕޮއިންޓާއެކު ބާސެލޯނާ އޮތީ ކުޅުނު 3 މެޗުންވެސް މޮޅުވެގެންނެވެ. ދެވަނައިގައި 7 ޕޮއިންޓާއެކު އޮތީ ވިޔަރެއާލްއެވެ. އެންމެފަހުގެ ޗެމްޕިއަން، މަޝްހޫރު ރެެއާލް މެޑްރިޑް ތާވަލުގެ 5 ވަނައިގައި އޮތީ 4 ޕޮއިންޓާއެކުއެވެ. ރެއާލްއަށް ކުރިއަށް އޮތީ މިމަހުގުެ 30 ވަނަ ދުވަހުގެ ރޭ ލަސް ޕަލްމަސްއާ ދެކޮޅަށް ކުޅެން ޖެހޭ މެޗެވެ.
