ރަޝިޔާއާ ދެކޮޅަށް ހަނގުރާމަ ކުރުމަށް އެމެރިކާ އާއި ހުޅަނގުން ދާދިފަހުން ޔޫކްރައިނަށް ދިން އެފް-16 މަރުކާގެ ފައިޓާ ޖެޓެއް ވެއްޓި އޭގެ ޕައިލޮޓް މަރުވެއްޖެ ކަމަށް ޔޫކްރައިނުގެ އަސްކަރިއްޔާއިން ބުނެފިއެވެ.
އެފް-16 ޖެޓް ވެއްޓިފައި ވަނީ މިމަހުގެ 26 ވަނަ ދުވަހުއެވެ. އެއީ ޔޫކްރައިނާ ދެކޮޅަށް 2022 ވަނަ އަހަރު ރަޝިޔާއިން ހަނގުރާމަ ފެށިފަހުން މިހާތަނަށް އެންމެ ވަރުގަދައަށް ހަމަލާދިން ދުވަހެވެ. މިހަމަލާގައި ރަޝިޔާއިން 200 އަށްވުރެ ގިނަ މިސައިލާއި ޑްރޯން ބޭނުން ކުރިއެވެ.
ޔޫކްރައިނުގެ އަސްކަރިއްޔާއިން ނެރެފައިވާ ބަޔާނުގައި ބުނެފައި ވަނީ ވެއްޓުނު ޖެޓް ދުއްވި ޕައިލެޓް ވަނީ ރަޝިޔާއިން ޔޫކްރައިނަށް ފޮނުވާލި އެތައް މިސަލައިކާއި ޑްރޯނެއް ވައްޓާލައި، ޔޫކްރައިނުގެ އެތައް ރައްޔިތުންގެ ފުރާނަ ސަލާމަތް ކޮށްދީފައި ކަމަށެވެ. އޭނާ މަރުވެގެންދިޔައީ ފުރާނައިން ގުރުބާންވެގެން ކަމަށް ޔޫކްރައިން އަސްކަރިއްޔާއިން ނެރެފައިވާ ބަޔާނުގައި ބުނެފައިވެއެވެ.
އެފް-16 ޖެޓް ވެއްޓުނީ ސީދާ ރަޝިޔާގެ މިސައިލެއް އަމާޒުވެގެން ކަމެއް ޔޫކްރައިން އަސްކަރިއްޔާއިން ނުބުނެއެވެ. އަދި ޖެޓް ވައްޓާލިކަން ރަޝިޔާގެ އަސްކަރިއްޔާއިން ވެސް ހާމަކޮށްފައެއް ނުވެއެވެ. މުހައްލިލުން ލަފާކުރާ ގޮތުގައި ޖެޓް ވެއްޓިފައި ވާނީ ރަޝިޔާގެ މިސައިލްތަކުން ދިފާއުވުމަށް ޕައިލެޓް މަސައްކަތް ކުރި ކުރުމުގެ ތެރޭގައެވެ.
އެމެރިކާ އާއި ހުޅަގުން އިސްނަގައިގެން ޔޫކްރައިނަށް އެފް-16 މަރުކާގެ 6 ޖެޓް ދިނީ މިދިޔަ މަހުއެވެ. ޖެޓް ދުއްވާނެ ޕައިލެޓުން ތަމްރީން ކޮށްދިނީ ހުޅަނގުންނެވެ. އެމެރިކާގެ އުފެއްދުމެއް ކަމުގައިވާ އެފް-16 ޖެޓެއްގެ އަގު އުޅެނި 70-13 މިލިޔަން ޑޮލަރާ ދެމެދުގެ އަގެއްގައެވެ.
ރަޝިޔާއިން ޔޫކްރައިނާ ދެކޮޅަށް ހަނގުރާމަ ފެށީ ނޭޓޯއިން ޔޫކްރައިނުގައި، ރަޝިޔާއަށް އަމާޒުކޮށް މިސަލައިލް ރާޑަރުތައް ބަހައްޓަން ފެށި މަސައްކަތް ހުއްޓާނުލުމުންނެވެ. އަދި ނޭޓޯގެ މެމްބަރު ގައުމަކަށްވާން ޔޫކްރައިން ފެށި މަސައްކަތް ހުއްޓާނުލުމުންނެވެ. ނޭޓޯގައި ނަގައި ކިޔަނީ އެމެރިކާ އާއި އިނގިރޭސިވިލާތް އަދި ޖަރުމަނާއި ފްރާންސެވެ.
