މެންޗެސްޓަރ ޔުނައިޓެޑަށް ކުޅެމުންދިޔަ ޖޯޑަން ސަންޗޯ ވާދަވެރި ޗެލްސީއަށް އަދި ޗެލްސީއަށް ކުޅެމުންދިޔަ ތަޖުރިބާކާރު ވިންގަރ ރަހީމް ސްޓާލިންގ އާސެނަލްއަށް މިއަދު ބަދަލުވެއްޖެއެވެ.
ސަންޗޯ، ޗެލްސީއަށް ބަދަލުވީ ލޯނު އެއްބަސްވުމެއްގެ ދަށުން މިސީޒަނުގެ ނިޔަލަށެވެ. އެކަމަކު މިއެއްބަސްވުމުގެ ދަށުން ކުރިއަށް އޮތް ހޫނު މޫސުމުގެ ޓްރާންސްފާގައި ދާއިމީ އެއްބަސްވުމެއްގެ ދަށުން ސަންޗޯ،24، ގަތުމުގެ ފުރުސަތު ޗެލްސީއަށް ލިބިދެއެވެ.
ލިވަޕޫލުން ކެރިޔަރ ފެށުމަށްފަހު މެންޗެސްޓަރ ސިޓީއަށް ބަދަލުވެ އެކްލަބާއެކު ގިނަ ކާމިޔާބީތަކެެއް ހޯދި ސްޓަރލިން އާސެނަލްއަށް ބަދަލުވީވެސް މިސީޒަނުގެ ނިޔަލަށެވެ.
އާސެނަލްއަށް ބަދަލުވުމަށްފަހު ސްޓަރލިންގ ބުނީ މިއީ ވަރަށް އުފާވެރި ވަގުތުކޮޅެއް ކަމަށެވެ. ސްޓަރލިންގއަށް އާސެނަލްގައި އިރުޝާދު ދޭނީ މެންޗެސްޓަރ ސިޓީގައި ސްޓަރލިންއަށް އެސިސްޓެންޓް ކޯޗެއްގެ ގޮތުގައި އިރުޝާދުދިން މިކޭލް އާޓެޓާއެވެ. ތަޖުރިބާކާރުން ދެކޭ ގޮތުގައި އާޓެޓާގެ އިރުޝާދުގެ ދަށުން މިސިޒަނުގައި ސްޓަރލިންގ ދަނޑުމަތީގައި އަލުން ވިދާލުމުގެ ފުރުސަތު ވަރަށް ބޮޑެވެ.
ޔޫރަޕުގެ ޓްރާންސްފާ މާކެޓުގެ ފަހު ދުވަސް ކުރިއަށްދާއިރު، ޓްރާންސްފާ މާކެޓުގައި އެންމެ ހަރަކާތްތެރިކޮށް ފެންނަނީ ސައުދީ އަރަބިއްޔާގެ ކްލަބުތަކާއި ޗެލްސީއެވެ.
