ސްޕެނިޝް ލަލީގާގައި ރޭ އަމިއްލަ ދަނޑުގައި ރެއާލް ވަޔަޑޮލިޑް އަތުން 7-0 ގެ ބޮޑު ތަފާތަކުން މޮޅުވެ، އަހަރުތަކަކަށްފަހު ބާސެލޯނާއިން އެކްލަބުގެ ސަޕޯޓަރުންނަށް ހަތްތަރީގެ އީދެއް ގެނެސްދީފިއެވެ.
މިމެޗުގައި ބާސެލޯނާގެ ތަރިޔަކަށްވީ 3 ލަނޑު ޖަހައި ހެޓްރިކް ހެދި ބްރެޒިލްގެ ވިންގަރ ރަފީނާއެވެ. އަނެއް ހަތަރު ލަނޑުގެ ތެރެއިން ދެލަނޑު ޖެހުމަށް މަގުފަހު ކޮށްދިނީވެސް ރަފީނާއެވެ. ފޯވާޑް ރޮބާޓް ލެވަންޑޮސްކީ އާއި ފޯވާޑް ފެރަން ޓޮރޭސް، ޑިފެންޑަރު ކުންޑޭ އަދި ދާދިފަހުން ބާސާއާ ގުޅުނު ހުނަރުވެރި މިޑްފީލްޑަރު ޑަނީ އޮލްމޯއެވެ.
ބަޔާން މިޔުނިކާއި ޖަރުމަނު ގައުމީ ޓީމުގެ ކުރީގެ ކޯޗް ހަންސީ ފްލިކުގެ އިރުޝާދުގެ ދަށުން މިސީޒަނާ ކުރިމަތިލި ބާސާއިން ވަނީ މުޅި މެޗް ކަހަލަ ގޮތަކަށް ކޮންޓްރޯލްކޮށް 23 ހަމަލާ އުފައްދާފައެވެ. މީގެތެރެއިން ވަޔަޑޮލިޑުގެ ގޯލަށް 11 ހަމަލާ އަމާޒުވިއެވެ. ބާސާގެ ގޯލަށް އަމާޒުކޮށް މުޅި މެޗުގައިވެސް ވަޔަޑޮލިޑަށް ފޮނުވާލެވުނީ އެންމެ ހަމަލާއެކެވެ.
ބާސާ އަތުން ރަށުން ބޭރުގައި އެންމެފަހުން ވަޔަޑޮލިޑް މޮޅުވީ 1997 ވަނަ އަހަރުއެވެ. އެ މެޗް ވަޔަޑޮލިޑުން ކާމިޔާބު ކުރީ 2-1 އިންނެވެ. އޭގެ ފަހުން ލަލީގާގައި ބާސާއާ ދެކޮޅަށް ކުޅުނު 17 މެޗުގެ ތެރެއިން 15 މެޗުން ވަޔަޑޮލިޑް ވަނީ ބަލިވެފައެވެ. އަނެއް ދެމެޗް ނިމުނީ އެއްވަރު ވެގެންނެވެ.
މިމޮޅާއެކު ތާވަލުގެ އެއްވަނައިގައި ބާސާ އޮތީ މިހާތަނަށް ކުޅުނު 4 މެޗުވެސް ކާމިޔާބުކޮށް 12 ޕޮއިންޓާއެކުއެވެ. ދެވަނައިގައި 8 ޕޮއިންޓާއެކު އޮތީ ރޭ އެތުލެޓިކް ކްލަބުގެ މައްޗަށް 1-0 އިން ކުރި ހޯދި އެތުލެޓިކޯ މެޑްރިޑެވެ. އެންމެފަހުގެ ޗެމްޕިއަން ރެއާލް މެޑްރިޑް 5 ވަނައިގައި އޮތީ 5 ޕޮއިންޓާއެކުއެވެ. ރާއްޖޭ ގަޑިން މިރޭ ދަންވަރު 12:30 ގައި ރެއާލް ނިކުންނާނީ ބެޓިސްއާ ދެކޮޅަށެވެ.
