ފްރާންސްގެ މަޝްހޫރު ފޯވާޑް ކިލިއަން އެމްބައްޕޭގެ ދެލަނޑުން 2-0 އިން ރެއާލް ބެޓިސް ބަލިކޮށް ރެއާލް މެޑްރިޑް ސްޕެނިޝް ލަލީގާގެ ތާވަލުގެ ދެވަނައަށް ރޭ ޖެހިލައިފިއެވެ.
ރެއާލް މެޑްރިޑުގެ ސެންތިއާގޯ ބަރްނަބާއޫ ސްޓޭޑިއަމްގައި ކުޅުނު މިމެޗުގައި އެމްބައްޕޭ ލަނޑު ޖެހީ 67 ވަނަ މިނެޓާއި 75 ވަނަ މިނެޓުގައެވެ. ދެވަނަ ކަނޑަކީ ޕެނަލްޓީއަކުން ކާމިޔާބު ކުރި ލަނޑެކެވެ. އެއީ ވިނީޝިއަސް ޖޫނިއަރއަށް ކުރި ފައުލަކަށް ލިބުނު ޕެނަލްޓީއެކެވެ.
މިއީ މިސީޒަނުގައި ރެއާލްއާ ގުޅުނު އެމްބައްޕޭ، ސްޕެނިޝް ލަލީގާގައި ކާމިޔާބު ކުރި ފުރަތަމަ ދެލަނޑުކަންވެސް ފާހަގަ ކޮށްލެވެއެވެ. އެމްބައްޕޭ ބަދަލު ކުރިވަގުތު، ރެއާލްގެ ސަޕޯޓަރުން ވަނީ "ސްޓޭންޑިންގ އޯވޭޝަން" އެއް އޭނާއަށް ދީފައެވެ.
މެޗަށްފަހު އެމްބައްޕޭ ބުނީ ދުނިޔޭގެ އެންމެ ބޮޑު، އެންމެ ވަރުގަދަ ކްލަބުގެ ސްޓޭޑިއަމްގައި ގިނަ ލަނޑުތަކެއް ޖެހުމުގެ ހުވަފެން އޭނާ ދެކޭ ކަމަށެވެ. "ރެއާލްއަށް ބަދަލުވެވުނު ހިސާބުން ފެށިގެން އަހަރެން މިހުންނަނީ ވަރަށް އުފަލުން. ކްލަބުގެ ސަޕޯޓަރުންނާއި ވެރިން އަދި ކުޅުންތެރިންގެ ގާތްކަން ބަހައްޓާކަން އަހަންނަށް އިހްސާސްވޭ. ލީގުގެ ފުރަތަމަ ދެމެޗުގައި އަހަންނަށް ލަނޑެއް ނުޖެހުނަސް ލަނޑު ޖެހޭނެ ކަމުގެ އިތުބާރު އޮތް. ކްލަބުގެ ސަޕޯޓަރުންނާއި ކުޅުންތެރިން އަހަންނަށް އިތުބާރު ކުރި މިކްލަބަށްޓަކައި، މި ބެޖަށްޓަކައި އަހަރެން ލަނޑު ޖަހާނެކަން" އެމްބައްޕޭ ބުންޏެވެ.
މިމެޗުން ލިބުނު 3 ޕޮއިންޓާއެކު ތާވަލުގެ ދެވަނައިގައި ރެއާލް އޮތީ 8 ޕޮއިންޓާއެކުއެވެ. އެއީ ލީގުގައި މިހާތަނަށް ކުޅުނު 4 މެޗުގެ ތެރެއިން 2 މެޗް ކާމިޔާބުކޮށް އަދި 2 މެޗް އެއްވަރުކޮށްގެންނެވެ. ތާވަލުގެ އެއްވަނައިގައި، ކުޅުނު ހުރިހާ މެޗެއް ކާމިޔާބުކޮށް 12 ޕޮއިންޓާއެކު އޮތީ ވާދަވެރި ބާސެލޯނާއެވެ.
