ޢައްޒާގައި ހަމާސްއިން ހިފަހައްޓާފައި ތިބި 6 މީހެއްގެ ހަށިގަނޑު ފެނުމާ ގުޅިގެން އިސްރާއީލުގައި ބޮޑެތި މުޒާހަރާތަކާއި ހަޅުތާލު ކުރުންތައް ފެށިއްޖެއެވެ.
މުޒާހަރާކުރާ މީހުންގެ ރުޅި އަމާޒުވެފައިވަނީ އިސްރާއީލިގެ ބޮޑުވަޒީރު ބެންޖަމިން ނަތަންޔާހޫއަށެވެ. މި ފަރާތްތަކުން ތުހުމަތުކުރަނީ ބާކީ ތިބި 100 މީހުން ދޫކޮށްލުމަށް ހުށަހަޅާފައިވާ އެއްބަސްވުމަށް ނެތަންޔާހޫ ހުރަސްއަޅަމުންދާ ކަމަށެވެ.
އާދީއްތަ ދުވަހު، ގާތްގަނޑަކަށް 300،000 މީހުން މަގުމައްޗަށް ނުކުމެ، ސަރުކާރުގެ ސިޔާސަތު ބަދަލުކުރުމަށް ގޮވާލިއެވެ. އިސްރާއީލުގެ އެންމެ ބޮޑު ވަޒީފާގެ ޔޫނިއަން ކަމުގައިވާ ހިސްޓަދްރޫޓުން ގޮވާލި މި ހަޅުތާލުގައި، ޓެކްނޮލޮޖީ ކުންފުނިތަކާއި، ހޮސްޕިޓަލްތަކާއި، އަދި އިސްރާއީލުގެ މައި ވައިގެ ބަނދަރު ހިމެނޭ މުހިންމު ދާއިރާތަކުން ބައިވެރިވިއެވެ. ހޯމަ ދުވަހުގެ ހެނދުނު ފެށުނު މި ހަޅުތާލު، ފަހުން ވަޒީފާއާބެހޭ ކޯޓަކުން ނިންމާލުމަށް އަމުރުކުރިއެވެ.
މި މުޒާހަރާތަކަކީ މި ހަނގުރާމަ ފެށުނީއްސުރެ ބޭއްވުނު އެންމެ ބޮޑު މުޒާހަރާތަކެވެ. ހަމައެކަނި ތެލްއަވީވުގައި 300،000 އަށްވުރެ ގިނަ މީހުން ބައިވެރިވިއެވެ. ސިޔާސީ ލީޑަރުން ދެބައިވެފައިވާއިރު، އިދިކޮޅު ލީޑަރު ޔައިރު ލަޕިޑް މި ހަޅުތާލަށް ތާއީދުކުރާއިރު، ހައްދުފަހަނައަޅާފައިވާ ރައިޓް-ވިންގް ވަޒީރުން މިކަން ކުށްވެރިކުރެއެވެ. ހަނގުރާމަ ހުއްޓުވުމަށް ކުރެވޭ މަޝްވަރާތައް ހުއްޓިފައިވާއިރު، ނަތަންޔާހޫ މި އެއްބަސްވުން ކުރިއަށްގެންދިއުމަށް ހުރަސްއަޅާ ޝަރުތުތަކެއް އިތުރުކުރަމުން ދާކަމަށް އެކި ފަރާތްތަކުން ދަނީ ތުހުމަތު ކުރަމުންނެވެ.
