ވަރލްޑް ކަޕް ކޮލިފައިންގައި ފަލަސްތީނުން ވަރުގަދަ ދެކުނު ކޮރެޔާއާ 0-0 އެއްވަރުކޮށް ޕޮއިންޓެއް ހޯދައި ފުޓްބޯޅައިގެ ދުނިޔެ ހައިރާން ކޮށްލައިފިއެވެ.
ދެކުނު ކޮރެއާގެ މަޝްހޫރު "ސޯލް ވަރލްޑް ކަޕް ސްޓޭޑިއަމް" ގައި ކުޅުނު މިމެޗުގައި ކޮރެއާގެ މަޝްހޫރު ތަރިން ކަމުގައިވާ ޓޮޓެންހަމްގެ ކެޕްޓަން ސަން ހިއުން މިން އާއި ޖަރުމަނުގެ މެއިންޒަށް ކުޅޭ ލީ ޖައެ ސަންގާއި ޕީއެސްޖީއަށް ކުޅޭ ލީ ކަންގ އިން ވެސް ކުޅުނެވެ.
ކޮރެއާގެ ވަރުގަދަ ޓީމު ހިފެހެއްޓުމަށް ފަލަސްތީނުން ވަނީ ފުރަތަމަ ހާފުގައި ވަރުގަދަ ދިފާއީ ކުޅުމެއް ކުޅެ، އަދި ދެވަނަ ހާފުގައި ކައުންޓަރ އެޓޭކިންގައި ކޮރެއާގެ ގޯލަށް ނުރައްކާ ކޮށްފައެވެ.
ކުޅިބަލަން ވަދެތިބި 60،000 އެއްހައި ކޮރެއާގެ ސަޕޯޓަރުން، ގައުމީ ޓީމަށް ތަރުހީބު ދިނުމުގެ ބަދަލުގައި ފުރަތަމަ ސިކުންތުން ފެށިގެން ފެނިގެން ގޮސްފައި ވަނީ ކޯޗް ހޮންގ މިޔަންގއަށް ދިމާކޮށް އަޑުގަދަ ކުރި މަންޒަރެވެ. ބޮޑު ސްކްރީނުން އޭނާ ދައްކާލި ކޮންމެ ފަހަރަކު ދިމާކުރުމުގެ އަޑުގަދަވިކަން ފާހަގަވިއެވެ. އަމިއްލަ ގައުމުގައި 2002 ވަނަ އަހަރު ބޭއްވި ވަރލްޑް ކަޕް ސެމީފައިނަލުގައި ކޮރެއާއިން ކުޅުނުއިރު ކެޕްޓަނަކަށް ހުރީ ހޮންގ މިޔަންގއެވެ. އެކަމަކު ކޮރެއާގެ ސަޕޯޓަރުން ޑިމާންޑް ކުރަމުން ދަނީ ބިދޭސީ ނަން މަޝްހޫރު މޮޅު ކޯޗަކާ ގައުމީ ޓީމު ހަވާލު ކުރުމަށެވެ.
ކެޕްޓަން ސަން މެޗަށްފަހު ބުނީ ސަޕޯޓަރުންގެ އަމަލާތަކާމެދު ހިތްހަމަ ނުޖެހޭ ކަމަށާއި ޓީމަށް ބޭނުންވަނީ ސަޕޯޓަރުންގެ ތާއީދާއި ލޯބި ކަމަށެވެ.
މިއީ ވަރލްޑް ކަޕް ކޮލިފައިން އޭޝިޔާ ޒޯނުގެ 3 ވަނަ ބުރުގެ ގްރޫޕް "ބީ" ގެ މެޗެކެވެ. މި ގްރޫޕުގައި ދެން ހިމެނެނީ އިރާގާއި ޖޯޑަން، ކުވައިތު އަދި އޮމާނެވެ. ކޮންމެ ގައުމަކުވެސް އެއްމެޗް ކުޅެފައިވާއިރު އޮމާނުގެ މައްޗަށް އިއްޔެ ހޯދި މޮޅާއެކު 3 ޕޮއިންޓް ކަށަވަރުކޮށް އެއްވަނައިގައި އޮތީ އިރާގެވެ.
