މަޝްހޫރު ތަރި ކްރިސްޓިއާނޯ ރޮނާލްޑޯ، ޔުއެފާ ނޭޝަންސް ލީގުގައި ރޭ ކްރޭޝިޔާ ކޮޅަށް ލަނޑު ޖަހައި، ކެރިޔަރުގައި 900 ލަނޑު ހަމަކުރުމަށް ދެކެމުންދިޔަ ހުވަފެން ހަގީގަތަކަށް ހަދައިފިއެވެ.
ޕޯޗުގަލްގެ ބެންފިކާގެ ދަނޑުގައި ކުޅުނު މިމެޗުގައި ރޮނާލްޑޯ ލަނޑު ޖެހީ ފުރަތަމަ ހާފުގެ 34 ވަނަ މިނެޓުގައެވެ. މި ލަނޑާއެކު ރޮނާލްޑޯ ވަރަށް ބޮޑަށް ޖަޒްބާތުގައި ޖެހި ރޮއޭގޮތް ވިއެވެ. މި ލަނޑަކީ ގައުމީ ޖާޒީގައި ރޮނާލްޑޯ ކާމިޔާބު ޖުރި 131 ވަނަ ލަނޑެވެ. ފުޓްބޯޅައިގެ ތާރިހުގައި ގައުމީ ޖާޒީގައި އެންމެ ގިނަ ލަނޑު ޖެހުމުގެ ރެެކޯޑް އޮތީވެސް ރޮނާލްޑޯ އަތުގައެވެ.
މީގެ އިތުރުން ރޮނާލްޑޯއަކީ ރަސްމީ ސިފައެއްގައި 800 ލަނޑު ޖެހި ފުރަތަމަ ކުޅުންތެރިޔާވެސް މެއެވެ. އެކަމަކު ރޮނާލްޑޯގެ ވާދަވެރިޔާ އާޖެންޓީނާގެ ލިއޮނަލް މެސީ ވަނީ ރޮނާލްޑޯގެ ފަހަތުން 800 ލަނޑު ހަމަކޮށްފައެވެ. މެސީ މިހާތަނަށް ކާމިޔާބު ކޮށްފައި ވަނީ 842 އެކެވެ. ބްރެޒިލްގެ މަޝްހޫރު ޕެލޭ ކާމިޔާބު ކޮށްފައި ވަނީ 765 ލަނޑެވެ.
900 ލަނޑު ހަމަ ކުރުމަށްފަހު ރޮނާލްޑޯ ބުނީ މިހާރު އޭނާގެ އަމާޒަކީ 1000 ލަނޑު ހަމަ ކުރުން ކަމަށެވެ. "އަނިޔާއެއް ނުވެ ސަލާމަތުން ހުރެވިއްޖެނަމަ އެއްހާސް ލަނޑު ހަމަ ކުރެވޭނެކަމުގެ ފުރިހަމަ ޔަގީންކަން އެބައޮތް" މެޗަށްފަހު ވަރަށް ބޮޑަށް އުފަލުން ހުރެ ރޮނާލްޑޯ ބުންޏެވެ.
ކްރޭޝިޔާ އަތުން ރޭ ޕޯޗުގަލް މޮޅުވީ 2-1 އިންނެވެ. މެޗުގެ 7 ވަނަ މިނެޓުގައި ޕޯޗުގަލް ލީޑް ނެގީ ޑިއޭގޯ ޑަލޮޓް ލަނޑުންނެވެ. އޭގެފަހުން ރޮނާލްޑޯ ލީޑް ފުޅާ ކޮށްދިނީއެވެ. ކްރޭޝިޔާގެ ހަމައެކަނި ލަނޑަކީ 41 ވަނަ މިނެޓުގައި ޑަލޮޓް އަތުން ބައިކޮޅަށް ވަން ލަނޑެކެވެ.
