އެމެރިކާ އާއި މެކްސިކޯ އަދި ކެނަޑާގައި 2026 ވަނަ އަހަރު ބޭއްވުމަށް ހަމަޖެހިފައިވާ ވަރލްޑް ކަޕަށް ކޮލިފައިވުމަށް، ރޭ ފަތިހު ޗިލީއާ ދެކޮޅަށް ކުޅުނު މެޗް މޮޅަށް ކުޅެ 3-0 އިން އާޖެންޓީނާ ކާމިޔާބު ކޮށްފިއެވެ.
އާޖެންޓީނާގެ އެސްޓާޑިއޯ މޮނިއުމެންޓަލް ސްޓޭޑިއަމްގައި ކުޅުނު މިމެޗުގެ ކުރިން، ދާދިފަހުން އާޖެންޓީނާ ގައުމީ ޓީމުން ރިޓަޔަރ ކުރި ލެޖެންޑް އެންހެން ޑިމާރިއާގެ އަގުވަޒަން ކުރުމުގެ ގޮތުން އާޖެންޓީނާ އެފްއޭއިން ހާއްސަ މެހްމާންދާރީއެއް ޑިމަރިއާއަށް އެރުވުން އޮތެވެ.
އަނިޔާގެ ސަބަބުން މިމެޗުގައި ކެޕްޓަން ލިއޮނަލް މެސީއަށް ކުޅެވެން ނެތުމުން މަޝްހޫރު 10 ނަންބަރު ޖާޒީގައި ކުޅުނީ ޕައުލޯ ޑިބާލާއެވެ. އަދި ކޯޗް ލިއޮނަލް ސްކަލޯނީ ކުޅުވީވެސް ތަފާތު ފޯމޭޝަނެއްގައެވެ. އެއީ 3-5-2 ފޯމޭޝަނަށެވެ. ދެ ފޯވާޑުން ގޮތުގައި ތިބީ ލައުޓާރޯ މާޓިނޭޒް އާއި ހޫލިއަން އަލްވަރޭޒްއެވެ.
ފުރަތަމަ ހާފް ދެ ގައުމުންކުރެ ގައުމަކަށް ލަނޑެއް ޖެހިފައިނުވާއިރު، ދެވަނަ ހާފް ފަށައިގެން މާގިނައިރުތަކެއް ނުވެ އާޖެންޓީނާއަށް ލީޑް ނަގައިދިނީ ހުނަރުވެރި މިޑްފީލްޑަރު މެކްއެލިސްޓާއެވެ. މިނަތީޖާގައި އޮވެ މެޗް ނިމެން ދަނިކޮށް އާޖެންޓީނާގެ ލީޑް ފުޅާކޮށްދިނީ ޗިލީގެ އޭރިޔާގެ ބޭރުން އުއްޑައެއްހެން ފޮނުވާލި ބާރު ހަމަލާއަކުން އަލްވަރޭޒްއެވެ. މިބޯޅަ ގޯލަށް ވަނީ މަތީ ދަނޑީގައި ޖެހިފައެވެ. މެޗުގެ އިތުރު ވަގުތުގައި އާޖެންޓީނާގެ 3 ވަނަ ލަނޑު ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑިބާލާއެވެ. 10 ނަންބަރު ޖާޒީގައި ޑިބާލާ ޖެހި ލަނޑާއެކު އާޖެންޓީނާގެ ކުޅުންތެރިންނާއި ސަޕޯޓަރުން ވަރަށް ބޮޑަށް އުފާ ފާޅުކުރިއިރު، ކޯޗް ސްކަލޯނީގެ މޫނުމަތިންވެސް ވަރަށް ބޮޑަށް ފަހްރުވެރިވި މަންޒަރު ފެނިގެންދިޔައެވެ.
މިމޮޅާއެކު ވަރލްޑް ކަޕް ކޮލިފައިން، ދެކުނު އެމެރިކާ ބައްރުގެ އެއްވަނައިގައި އާޖެންޓީނާ އޮތީ މިހާތަނަށް ކުޅުނު 7 މެޗުން 18 ޕޮއިންޓް ހޯދައިގެންނެވެ. 6 މެޗުން މޮޅުވިއިރު ބަލިވީ އެންމެ މެޗަކުންނެވެ. ދެވަނައިގައި އުރުގުއޭ އޮތީ 13 ޕޮއިންޓާއެކުއެވެ. ބާރަ ޕޮއިންޓާއެކު ތިންވަނައިގައި އޮތީ ކޮލަމްބިއާއެވެ. މަޝްހޫރު ބްރެޒިލް 7 ޕޮއިންޓާއެކު އޮތީ 6 ވަނައިގައެވެ.
