ދެކުނު ލުބުނާނުގެ ފަރޫން ނަމަކަށްކިޔާ ރަށަކަށް އިސްރާއީލުން ދިން ވައިގެ ޙަމަލާއެއްގައި ލުބުނާނުގެ 3 ޕެރަމެޑިކުން މަރުވެ އަދި ދެ މީހަކު ޒަޚަމުވެއްޖެކަމަށް ލުބުނާނުގެ ޞިއްޙީ ވުޒާރާއިން ބުނެފިއެވެ.
މި ޙަމަލާ ދީފައިވަނީ އިސްރާއީލުން ކުރިން ދިން ޙަމަލާތަކުން ރޯވެފައިވާ އަލިފާން ނިއްވަމުން ދަނިކޮށެވެ. ޒަޔަނިސްޓު ސިފައިންގެ ބަޔާނެއްގައި ބުނެފައިވަނީ އެ ޙަމަލާ އަމާޒުކޮށްފައިވަނީ އެ ސަރަޙައްދުގައި ހަރަކާތްތެރިވާ ހިޒްބުﷲ މުޖާހިދުންގެ އަމަލް ޖަމާޢަތުގެ މެންބަރުންނަށްކަމަށެވެ.
ލުބުނާނުގެ ބޮޑުވަޒީރު ނަޖީބް މިކާތީ މި ޙަމަލާ ކުށްވެރިކުރައްވައި އެއީ ބައިނަލްއަޤްވާމީ ޤާނޫނާ ޚިލާފު ކަމެއްކަމަށް ވިދާޅުވެފައިވެއެވެ. އަދި އިތުރަށް ގޯސްވަމުންދާ ހަނގުރާމައާ ބެހޭގޮތުން މަޝްވަރާކުރުމަށް ހުޅަނގުގެ ޤައުމުތަކުގެ ސަފީރުންނާއި ބައިނަލްއަޤްވާމީ ޖަމްޢިއްޔާތަކާއެކު ކުއްލި ބައްދަލުވުމެއް ބާއްވާނެކަމަށް އިޢުލާނުކުރައްވާފައިވެއެވެ.
ލުބުނާނުގެ ޞިއްޙީ ވުޒާރާއިން ހާމަކޮށްފައިވާ ގޮތުގައި ހަނގުރާމަ ފެށުނުފަހުން 25 ޕެރަމެޑިކުންނާއި ދެ ޞިއްޙީ މުވައްޒަފުން މަރުވެފައިވާއިރު، 94 މީހުންނަށް ޒަޚަމުވެފައިވެއެވެ.
ފަރޫންގައި ދިން ޙަމަލާއަށް ރައްދު ދިނުމުގެ ގޮތުން ހިޒްބުﷲ އިން އިސްރާއީލުގެ އަސްކަރީ މައި މަރުކަޒަކަށް މިސައިލް ދޫކޮށްފައިވެއެވެ. އޮކްޓޯބަރު 8 އިން ފެށިގެން އިތުރަށް ގޯސްވެފައިވާ މި ހަނގުރާމައިގައި ލުބުނާނުގެ ގާތްގަނޑަކަށް 140 އާންމު ރައްޔިތުން މަރުވެފައިވާއިރު، ލުބުނާނާއި އިސްރާއީލުގެ ބޯޑަރުގެ ދެފަރާތުން އެތަކެއްހާސް މީހުން ގެދޮރު ދޫކޮށް ފިލާފައިވެއެވެ.
