ޤަތަރުން ދިވެހިރާއްޖޭއަށް ކަނޑައެޅުއްވި އައު ސަފީރު، ޖަސީމް ބިން ޖަބާރު ޖޭ.ބީ. އަލް ސޮރޫރު، އެ މަނިކުފާނުގެ ސަފީރު ކަމުގެ ފަތްކޮޅު ޗީފް އޮފް ޕްރޮޓޮކޯލް މުހައްމަދު ޝަހުދީއާ ހަވާލުކުރައްވައިފިއެވެ.
ޑިޕްލޮމެޓިކް އާދަކާދައިގެ މަތީން، ސަފީރުކަމަށް އައްޔަންކުރާ ފަރާތްތަކުގެ ސަފީރު ކަމުގެ ފަތްކޮޅުގެ ކޮޕީ އާންމުކޮށް ފޮރިން މިނިސްޓްރީއަށް ރަސްމީކޮށް ފަތްކޮޅު އެރުވުމުގެ ކުރިން ހަވާލުކުރަންވާނެއެވެ.
އަދި ރައީސުލްޖުމްހޫރިއްޔާގެ އޮފީހުގައި ކުރިއަށް ދާނެ ފަތްކޮޅު އެރުވުމުގެ ރަސްމިއްޔާތު ކުރިއަށް ދާނެ ގޮތުގެ ތައާރަފެއް ޗީފް އޮފް ޕްރޮޓޮކޯލް ސަފީރަށް ދެއްވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ފަތްކޮޅު އެރުވުމަށްފަހު، ޤަތަރުގެ އާ ސަފީރު، ފޮރިން މިނިސްޓަރ މޫސާ ޒަމީރުގެ އަރިހަށް އިހުތިރާމްގެ ޒިޔާރަތެއް ކުރެއްވުމަށް ވަނީ ހަމަޖެހިފަ އެވެ.
