ޔުއެފާ ނޭޝަންސް ލީގުގައި ރޭ މަޝްހޫރު ފްރާންސާއި އިޓަލީ އަދި ފޯވާޑް އާލިން ހާލަންޑުގެ ލަނޑުން ނޯވޭ މޮޅުވެއްޖެއެވެ.
މިދިޔަ ހަފްތާގައި އިޓަލީ އަތުން އަމިއްލަ ދަނޑުގައި ބަލިވެ ގިނަ ފާޑުކިޔުންތަކެއް އަމާޒުވެފައިވާ ފްރާންސް މޮޅުވީ އަމިއްލަ ދަނޑުގައި ބެލްޖިއަމްއާ ވާދަކޮށް 2-0 އިންނެވެ. ލަނޑު ޖަހައިދިނީ ކޯލޯ މުއާނީ އާއި އޮސްމާނޭ ޑެމްބެލޭއެވެ.
ފްރާންސް ބަލިކޮށް ޔުއެފާ ނޭޝަންސް ލީގް ކެމްޕެއިން ވަރުގަދަ ފެށުމަކުން ފެށި އިޓަލީ ރޭ މޮޅުވީ ހައްދުފަހަނައެޅި އިޒްރޭލާ ވާދަކޮށް 2-1 އިންނެވެ. ހަންގޭރީގައި ކުޅުނު މިމެޗުގައި އިޓަލީއަށް ލަނޑު ޖަހައިދިނީ ޑޭވިޑް ފްރައްޓެސީ އާއި މޮއިސް ކީންއެވެ. އިންޓަމިލާނަށް ކުޅޭ ހުނަރުވެރި މިޑްފީލްޑަރު ފްރައްޓެސީ، ފްރާންސް ކޮޅަށްވެސް ލަނޑު ޖެހިއެވެ.
މަޝްހޫރު ފޯވާޑް ހާލަންޑުގެ ނޯވޭ ރޭ 2-1 އިން ކުރި ހޯދީ، އެންމެފަހުގެ ޔޫރޯގައި ގިނަބަޔަކު ހައިރާންކޮށްލި އޮސްޓްރިއާގެ މައްޗަށެވެ. ނޯވޭގައި ކުޅުނު މިމެޗުގައި ފުރަތަމަ ލަނޑު ޖަހައި ލީޑް ނެގީވެސް ނޯވޭއިންނެވެ. މިލަނޑު ކާމިޔާބު ކޮށްދިނީ ފެލިކްސް ހޯން މީރޭއެވެ. އެކަމަކު ތަޖުރިބާކާރު މިޑްފީލްޑަރު މާސެލް ސަބިޓްޒާގެ ލަނޑުން ފުރަތަމަ ހާފް ނިމުމުގެ ކުރިން އޮސްޓްރިއާއިން އެއްވަރު ކުރިއެވެ. ނޯވޭއަށް ތިން ޕޮއިންޓް ލިބުނީ މެޗުގެ 80 ވަނަ މިނެޓުގައި ހާލަންޑް ކާމިޔާބުކޮށްދިން ލަނޑުން މެޗް ކާމިޔާބު ކޮށްގެންނެވެ.
މިމޮޅާއެކު ނޯވޭ، އެގައުމުގެ ހިމެނޭ ގްރޫޕުގެ 2 ވަނައިގައި އޮތީ 4 ޕޮއިންޓާއެކުއެވެ. އެއްވަނައިގައި އޮތް ސްލޮވީނިއާއަށްވެސް ލިބިފައި ވަނީ 4 ޕޮއިންޓެވެ. ފްރާންސް ހިމެނޭ ގްރޫޕުގެ އެއްވަނައިގައި 6 ޕޮއިންޓާއެކު އިޓަލީ އޮތްއިރު، 3 ޕޮއިންޓާއެކު ދެވަނައިގައި އޮތީ ފްރާންސެވެ. ބެލްޖިއަމް 3 ވަނައިގައި އޮތީވެސް 3 ޕޮއިންޓާއެކުއެވެ.
