ޣައްޒާގެ ޚާން ޔޫނިސްގެ މަވާސީ ކޭމްޕަށް ވައިގެ މަގުން ހަމަލާދީ ޒަޔަނިސްޓް އިޒްރޭލުން ރޭ ބޮޑު ޤަތުލް ޢާންމެއް ހިންގައިފި ކަމަށް އަލްޖަޒީރާއިން ރިޕޯޓް ކޮށްފިއެވެ.
ފަލަސްތީނުގެ ކަމާބެހޭ އިދާރާތަކާ ހަވާލާދީ އަލްޖަޒީރާއިން ބުނީ އިޒްރޭލުން އަލް މަވާސީ ކޭމްޕުގެ ޓެންޓްތަކަށް މިސައިލުން ދިން ޢުދުވާނީ ހަމަލާގައި 40 މީހުން ޝަހީދުވެފައިވާކަން މިހާތަނަށް ކަށަވަރު ކުރެވިފައިވާ ކަމަށެވެ. އަދިވެސް މަވާސީ ކޭމްޕު ތެރެއިން ޝަހީދުވެފައިވާ ހަށިގަނޑުތައް ފެނުމަކީ އެކަށީގެންވާ ކަމެއް ކަމުގައިވާތީ، މީހުން ހޯދުމުގެ މަސައްކަތް ކުރިއަށްދާ ކަމަށް ޣައްޒާގެ ސިވިލް ޑިފެންސާ ހަވާލާދި އަލްޖަޒީރާއިން ބުނެއެވެ.
ފޮޓޯޓަކުން ފެންނަ ގޮތުގައި، ޣައްޒާގެ ގިނަ އަދަދެއްގެ އާންމު ރައްޔިތުން ބޯހިޔާވަހިކަން ހޯދައިގެން ތިބި މަވާސީ ކޭމްޕުގެ ޓެންޓްތަކަށް އަމާޒުކޮށް ހައްދު ފަހަނައެޅި އިޒްރޭލު ސިފައިން މިސައިލުން ދިން ހަމަލާގެ ސަބަބުން އެސަރަހައްދުގައި 30 ފޫޓުގެ ފުން ވަޅުގަނޑެއްވެސް ވަނީ ހެދިފައެވެ. މަވާސީ ކޭމްޕަކީ "ސޭފް ޒޯނެއް" ކަމަށް އިޒްރޭލުގެ ހައްދުފަހަނައެޅި އަސްކަރިއްޔާއިން ކަނޑައަޅާފައިވާތީ، ވަރަށް ގިނަ އަދަދެއްގެ ބަޔަކު އެސަރަހައްދުގައި ޓެންޓް ޖަހައިގެން ތިބިކަމަށް އަލްޖަޒީރާއިން ބުނެއެވެ.
އިޒްރޭލުން ވަނީ މިދިޔަ މަހު ޣައްޒާގެ މިސްކިތެއްގައި ފަތިސް ނަމާދު ކުރަން ތިބި ބަޔަކަށްވެސް މިސައިލުން ހަމަލާދީ އެތައްބަޔަކު ޝަހީދުކޮށް ބޮޑު ޤަތުލް ޢާންމެއް ހިންގާފައެވެ. މިދިޔަ އަހަރުގެ އޮކްޓޫބަރު މަހުގެ 8 ވަނަ ދުވަހުން ފެށިގެން ޣައްޒާގެ ރައްޔިތުންނާ ދެކޮޅަށް އިޒްރޭލުން ޤަތުލް ޢާންމުތައް ހިންގަމުން އަންނައިރު، ދުނިޔޭގެ ސުލްހަ ބެލެހެއްޓުމާއި ހަވާލުވެ އޮތް އދ. އޮތީ އިޒްރޭލުގެ އަމަލުތައް ހުއްޓުވުމަށް ނުކުޅެދިފައެވެ.
