ޖެނެރޭޓިވް އޭއައިގެ ޤާބިލިއްޔަތުކަމަށް ޚާއްޞަކޮށް ފަރުމާކުރެވިފައިވާ އެޕަލްގެ ފުރަތަމަ ސްމާޓްފޯނު، އައިފޯން 16 އެކުންފުނިން ދައްކާލައިފިއެވެ.
އިއްޔެ އެޕަލްއިން ބޭއްވި "ގްލޯޓައިމް" އިވެންޓުގައި ދައްކާލި އައިފޯން 16 ސީރީޒްގައި ހިމެނެނީ އިތުރަށް ފުރިހަމަކުރެވިފައިވާ އޭއައިގެ ބޭނުން ހިފާ ފީޗާޒްއާއި، އަޕްގްރޭޑްކުރެވިފައިވާ ހާޑްވެއަރ، އަދި ޒަމާނީ ޑިޒައިނެކެވެ.
އައިފޯން 16 ސީރީޒްގެ އަގު ފެށެނީ ބޭސިކް މޮޑެލްގެ 6.1 އިންޗީގެ ސްކްރީނާއެކު 799 ޑޮލަރުންނެވެ. 6.7 އިންޗީގެ ސްކްރީނާއެކު އައިފޯން 16 ޕްލަސްގެ އަގަކީ 899 ޑޮލަރެވެ. ޕްރޯ މޮޑެލްތަކުގެ އަގު ފެށެނީ 6.3 އިންޗީގެ އައިފޯން 16 ޕްރޯއަށް 999 ޑޮލަރުން އަދި 6.9 އިންޗީގެ ޕްރޯ މެކްސްއަށް 1،199 ޑޮލަރުންނެވެ. ޕްރޯ މޮޑެލްތަކުގައި 1ޓީބީ ސްޓޯރޭޖް ހިމެނޭކަމަށް އެޕަލްއިން ހާމަކުރިއެވެ.
ހުރިހާ މޮޑެލްތަކެއްވެސް މިމަހު 20 އިން ފެށިގެން ލިބެން ހުންނާނެއެވެ. އަދި ކަޅު، ހުދު، ފިޔާތޮށި، ޓީލް އަދި އަލްޓްރާމެރިން، މި ފަސް ކުލައިގައި ލިބެން ހުންނާނެއެވެ.
އައިފޯން 16 ސީރީސްގެ މައިގަނޑު ޚާއްޞަ ކަމަކީ އޭގޭ އޭ-18 ޗިޕެވެ. މި ޗިޕުން %30 އަށް ވުރެ ހަލުވި ޕަރފޯމަންސްއެއް ފޯރުކޮށްދޭނެކަމަށް އެޕަލްއިން ބުނެއެވެ. މިއީ އޭއައި ފީޗަރތައް ޕްރޮސެސްކުރުމަށް ވަރަށް މުހިންމު ކަމެކެވެ.
މީގެ އިތުރުން، އައިފޯން 16 ސީރީސް ގައި 48 މެގަޕިކްސެލްގެ ކެމެރާއެއް ހިމެނޭއިރު، އައު ކެމެރާ ކޮންޓްރޯލް ފިތަކާއި، އަދި އޭއައި އާއެކު އިތުރަށް ފުރިހަމަކުރެވިފައިވާ ފޮޓޯ އެޕެއްވެސް ހިމެނޭނެއެވެ.
މި އިވެންޓުގައި ފޯނުތަކުގެ އިތުރުން އެޕަލް އިންޓެލިޖެންސްވެސް ދައްކާލިއެވެ. މިއީ އަންނަން އޮތް އައިއޯއެސް 18 ގައި ހިމެނޭ ޖެނެރޭޓިވް އޭއައި ފީޗަރތަކެކެވެ. ސިރީ، މިހާރު އޯޕަންއޭއައިގެ ޗެޓްޖީޕީޓީއާ އެކުވެފައިވާތީ، ތިމާގެ ބަހުގެ ފުންމިނަށް އިތުރަށް ވިސްނައި އަދި އެކިއެކި ރިކުއެސްޓުތަށް ހަނދާންކޮށް، ދައްކާ ގުޅުންތަށް ދެނެގަނެއެވެ.
އިމޭޖް ޕްލޭގްރައުންޑް ފަދަ އައު ވަސީލަތްތަކުން ޔޫޒާޒްއަށް އޭއައި ބޭނުންކޮށްގެން ފޮޓޯއާއި އެކިކަހަލަ މަންޒަރުތައް އުފެއްދުމުގެ ފުރުސަތުވެސް ލިބޭނެއެވެ. އަދި އޭއައި އާއެކު އެންހާންސްކުރެވިފައިވާ ކެމެރާ ކޮންޓްރޯލްއިން ކެމެރާއަށް ފެންނަ ތަކެއްޗާއި ތަންތަނާ ބެހޭ މަޢުލޫމާތު ވަގުތުން ފޯރުކޮށްދިނުމުގެ ޤާބިލްކަން ލިބޭނެއެވެ.
މީގެ އިތުރުން، އެޕަލްއިން އައު އެޕަލް ވޮޗް ސީރީޒް 10 އާއި، އެއަރޕޮޑްސް 4 އާއި، އެއަރޕޮޑްސް ޕްރޯ 2 ވެސް އިއުލާނުކުރިއެވެ. މި ކޮންމެ އުފެއްދުމެއްގައިވެސް އިތުރު ފީޗާސްއާއި ޤާބިލިއްޔަތުތަކަކާއި ފުރިހަމަކުރެވިފައިވާ ޑިޒައިންތަކެއް ހިމެނެއެވެ. އެޕަލް ވޮޗް އާއި އެއަރޕޮޑްސްވެސް ސެޕްޓެމްބަރު 20 އިން ފެށިގެން ލިބެންހުންނާނެއެވެ.
އައިފޯން 16 ސީރީޒްއއަކީ އޭއައިގެ ބޭނުން ހިފާ ޓެކްނޮލޮޖީގައި އެޕަލްއަށް އެޅުނު ވަރަށް މުހިންމު ފިޔަވަޅެކެވެ. މިއާއެކު ސްމާޓްފޯނުތަކުގެ އައު އީޖާދުތަކުގެ މިންގަނޑުތައް އަލުން ކަނޑައެޅިގެންދާނެ ކަމަށް ބެލެވެއެވެ.
