ޔޫކްރައިނަށް ހަމަލާ ދިނުމަށް ރަޝިޔާއަށް ކުރު ރާސްތާ ބެލެސްޓިކް މިސައިލު އިރާނުން ފޯރުކޮށްދޭތީ އެމެރިކާއިން އެކަމަށް ނުރުހުން ފާޅުކޮށްފިއެވެ.
އެމެރިކާ ސެކްރެޓަރީ އޮފް ސްޓޭޓް އެންޓޮނީ ބްލިންކެން އިނގިރޭސިވިލާތުގައި ނޫސްވެރިންނާ ވާހަކަފުޅު ދައްކަވަމުން އިއްޔެ ވިދާޅުވީ އިރާނުން ފޮނުވި ކުރު ރާސްތާ ބެލެސްޓިކް މިސައިލުގެ ފުރަތަމަ ސިޕްމަންޓް މިހާރު ރަޝިޔާގެ އަސްކަރިއްޔާއަށް ލިބިފައިވާ ކަމަށެވެ. އަދި މި ހަތިޔާރު ކުރިއަށް ދެތިން ހަފްތާގެ ތެރޭގައި ޔޫކްރޭނާ ދެކޮޅަށް ރަޝިޔާއިން ބޭނުން ކުރުމަކީ ވަރަށް ކައިރި ކަމެއް ކަމަށް ގަބޫލް ކުރެވޭ ކަމަށެވެ.
"ގަބޫލް ކުރެވޭ ގޮތުގައި އިރާނުން ފޯރުކޮށްދިން ބެލެސްޓިކް މިސައިލް ރަޝިޔާއިން ބޭނުން ކުރާނީ، ޔޫކްރައިން ތެރެއަށް މިހާރު ވެދެފައިވާ ރަޝިޔާގެ ފައުޖުތަކުން. މީގެ މަގްސަދަކަށް ވާނީ ބޭނުންވާ އަމާޒަށް ފްރޮންޓް ލައިން ތެރެއިން ހަމަލާ ދިނުން" އިނގިރޭސިވިލާތުގެ ފޮރިން ސެކްރެޓަރީ ޑޭވިޑް ލަމީއާއެކު ނޫސްވެރިނާ ބައްދަލު ކުރައްވި ބްލިންކެން ވިދާޅުވިއެވެ.
ހުޅަނގުގެ ބައެއް މީޑިޔާ ރިޕޯޓުތައް ބުނާ ގޮތުގައި އިރާނުން ވަނީ ކުރު ރާސްތާ ބެލިސްޓިކު މިސައިލުގެ 200 އެއްހައި މިސައިލު ރަޝިޔާއަށް ފޯރުކޮށްދީފައެވެ.
ޔޫކްރޭނާ ދެކޮޅަށް ބޭނުން ކުރުމަށް ރަޝިޔާއަށް ހަތިޔާރު ފޯރުކޮށްދިން ކަމަށް އެމެރިކާއިން ކުރާ ތުހުމަތުތައް އިރާނުން ވަނީ ދޮގު ކުރެއެވެ. އިރާނުން ދާދިފަހުން ނެރުނު ބަޔާނެއްގައި ބުނެފައި ވަނީ އެއްވެސް ގައުމަކާ ދެކޮޅަށް ލާއިންސާނީ ގޮތެއްގައި ބޭނުން ކުރުމަށް އެއްވެސް ހާލެއްގައި އިރާނުން ހަތިޔާރު ފޯރު ނުކޮށްދޭނެ ކަމަށާއި އެކަމަކު ކަނޑައެޅިފައިވާ އިންތަކުގެ ތެރެއިން އެކުވެރިކަމާއެކު މަސައްކަތް ކުރާ ގައުމުތަކަށް ހަތިޔާރު ފޯރުކޮށްދިނުމުގެ ހައްގު އިރާނަށްވެސް ލިބިގެންވާ ކަމަށެވެ.
ފާހަގަ ކޮށްލަން ޖެހޭ ކަމަކީ ހައްދުފަހަނައެޅި އިޒްރޭލުން، ހަތިޔާރެއް ނެތް ފަލަސްތީނުގެ ރައްޔިތުންނާ ދެކޮޅަށް ޤަތުލް އާންމުތައް ހިންގަމުން ދާއިރު، އިޒްރޭލަށް ހަތިޔާރާއި ފައިސާ އެހެނިހެން ވަސީލަތްތައްވެސް ފޯރުކޮށްދެމުންް ދަނީ އެމެރިކާއިންނެވެ.
