ޒަޔަނިސްޓް އިޒްރޭލުން މިދިޔަ އަހަރުގެ އޮކްޓޫބަރު 8 ވަނަ ދުވަހުން ފެށިގެން ފަލަސްތީނުގެ ރައްޔިތުންނާ ދެކޮޅަށް ހިންގަމުން އަންނަ ޤަތުލް ޢާންމުގައި ރޭ ޣައްޒާގެ ސްކޫލަކަށް ހަމަލާދީ ފަލަސްތީނުގެ 12 މީހުން ޝަހީދު ކޮށްލައިފިއެވެ.
އދ.އިން ހިންގަމުން އަންނަ މި ސްކޫލަށް ޒަޔަނިސްޓް ފައުޖުން ދިން ހަމަލާގައި އެއިދާރާގެ 6 މުވައްޒަފަކު މަރުވެފައިވާއިރު، އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވަނީ މި ހަމަލާ ވަރަށް ބޮޑަށް ކުއްވެރި ކުރައްވައި ވާހަކަފުޅު ދައްކަވާފައެވެ.
ސްކޫލުން ރައްކާތެރިކަން ހޯދައިގެން ތިބި ބައެއް މީހުންނާ ހަވާލާދީ އަލްޖަޒީރާއިން ބުނެފައިވާ ގޮތުގައި ޒަޔަނިސްޓް އިޒްރޭލުގެ އަސްކަރިއްޔާއިން ސްކޫލަށް ހަމަލާދިނީ މިސައިލުންނެވެ. ހަމަލާގެ ސަބަބުން ބައެއް މީހުންގެ ހަށިގަނޑުތައް ވަކިކުރަން ނޭނގޭ ވަރަށް ކުދިކުދިވެފައިވާ ކަމަށް އަލްޖަޒީރާއިން ބުނެއެވެ.
ޒަޔަނިސްޓް އިޒްރޭލުގެ ޤަތުލް ޢާންމުތަކުގައި ފާއިތުވެދިޔަ 24 ގަޑިއިރު ތެރޭގައި ރަފަހުން 3 މީހުން، ޖަބަލިޔާ ރެފިއުޖީ ކޭމްޕުން 3 މީހުން، ޒައިތޫން ނެއިބަރހުޑުން 2 މީހުން ޝަހީދު ކޮށްލާފައިވާ ކަމަށް ފަަލަސްތީނުގެ "ވަފާ" ނޫހުން ބުނެއެވެ.
ފަލަސްތީނު ރައްޔިތުންގެ ނަސްލު ނައްތާލުމަށް ފަށާފައި ޤަތުލް ޢާންމުގައި މިދިޔަ 11 މަސް ދުވަހުގެ ތެރޭގައި ޒަޔަނިސްޓުން ވަނީ ފަލަސްތީނުގެ 41،000 އަށްވުރެ ގިނަ މީހުން ޝަހީދުކޮށްލައި، ޣައްޒާގެ މުޅި އިންފްރާސްޓްރަކްޗަރ ހަލާކުކޮށް، މުޅި އާބާދީ ވަނީ ހާލުގައި ޖައްސާފައެވެ.
އިޒްރޭލުގެ ޤަތުލް ޢާންމުތައް ހުއްޓުވުމުގައި މުޅި ދުނިޔެ ނުކުޅެދިފައިވާއިރު، އިޒްރޭލުގެ އަނިޔާވެރިކަމާ ދެކޮޅަށް ޖިހާދު ކުރަމުން އަންނަ ފަލަސްތީނުގެ ޖަމާއަތްތަކުން ބުނަމުން ދަނީ މަސްޖިދުލް އަޤްސާ އާއި ފަލަސްތީނުގެ އެހެނިހެން ބިންތައް މިނިވަން ނުކުރެވެނީސް ޖިހާދު ހުއްޓާނުލާނެ ކަމަށެވެ.
