ބޮލީވުޑުގެ މަޝްހޫރު ޖޯޑް، ދީޕިކާ ޕަދުކޯންއާއި ރަންވީރު ސިންގުގެ ފުރަތަމަ ދަރިފުޅު، އާދީއްތަ ދުވަހު އުފަންވުމާއި ގުޅިގެން މިވަނި ބޮލީވުޑަށް އީދެއް އައިސްފައެވެ.
ލިބުނީ އަންހެން ކުއްޖެއްކަމަށް އެ ދެމީހުން ބުނެފައިވެއެވެ. މި އުފާވެރި ޚަބަރު އެ ދެމަފިރުން ހިއްސާކޮށްފައިވަނީ އިންސްޓަގްރާމްގައި ޕޯސްޓެއްގައިއެވެ.
މި އިޢުލާނާއެކު އެމީހުންގެ ސެލެބްރިޓީ ރަޙްމަތްތެރިންނާއި ފޭންސުން އުފަލާއި ލޯބީގެ ރާޅެއް އުފައްދާލިއެވެ.
ކްރިތި ސަނޯން، ޕަރިނީތި ޗޯޕްރާ އަދި އަރްޖުން ކަޕޫރު ފަދަ ތަރިން މި ޕޯސްޓަޓަށް މުބާރިކުބާދީގެ މެސެޖުތައް ފޮނުވާފައިވެއެވެ. ޝްރައްދާާ ކަޕޫރު، އަނަންޔާ ޕަންޑޭ އަދި ބޫމީ ޕެޑްނެކަރު ފަދަ އެހެން ތަރިންވެސް ހެޔޮ އެދުންތައް ފޮނުވާފައިވެއެވެ. އަތިޔާ ޝެޓީ، މަލައިކާ އަރޯރާ އަދި ސޮނަކްޝީ ސިންހާ ވެސް ހިތުގެ އިމޯޖީތަކާއެކު ލޯބި ފާޅުކޮށްފައިވެއެވެ.
މި ކުއްޖާ ވިހެއީ މުންބާއީގެ އެޗް.އެން ރިލަޔަންސް ހޮސްޕިޓަލުގައި ކަމަށް ރިޕޯޓުކުރެވެއެވެ. ދީޕިކާ އާއި ރަންވީރު އެމީހުންގެ ދަރިފުޅު ލިބޭނެކަން ފެބްރުއަރީ މަހު އިޢުލާނުކޮށް، ސެޕްޓެމްބަރުގައި ދަރިފުޅު ވިހާނެކަމަށް އުފަލާއެކު ބުނެފައިވެއެވެ. މަސައްކަތުގެ ދާއިރާއިން ބަލާއިރު، ދީޕިކާ އަވަހަށް "ސިންގަމް އަގެއިން" ގައި ފެނިގެންދާނެއެވެ. މި ފިލްމު ރިލީޒްވާނީ މި އަހަރުގެ ދިވާލީގައެވެ.
